Ғазоликлар яна хавф остида: Исроил ёрдам ташкилотлари фаолиятини чекламоқчи

Бу ҳаракат фаластинликлар учун ҳалокатли бўлиши мумкин.

“Ал-Жазира” нашри ушбу буйруқни тўхтатишини сўраб 17 та халқаро ёрдам гуруҳи Исроил Олий судига мурожаат қилганини маълум қилди. Улар Исроил фармойиши тўлиқ суд тартибида кўриб чиқилгунга қадар тақиқни вақтинчалик тўхтатиб туришни сўраган.

Оxfam хайрия ташкилотининг 24 февралда эълон  қилган баёнотига кўра, Ғазо ва босиб олинган Фаластин ҳудудининг қолган қисмида ёрдам операцияларини мажбурий ёпиш ҳаракати шанба куниёқ бошланиши мумкин.

“Бу ҳолатнинг таъсири зудлик билан намоён бўлиб, нафақат алоҳида ташкилотлар, балки бутун гуманитар тизимга кенг ёйилади”, — дея огоҳлантирди Oxfam.

Баёнот давомида Ғазога гуманитар ёрдам киришига қўйилган чекловлар ҳамда аҳоли зич яшайдиган ҳудудларга қайта зарбалар берила бошланганлиги туфайли оилалар ҳамон ташқи ёрдамга муҳтож бўлиб қолаётгани айтилган.

Исроил ҳукумати 2025 йил 30 декабрь куни “Чегара билмас шифокорлар” (французча қисқартмаси – MSF), “Oxfam”, Норвегия қочқинлар Кенгаши ва CARE каби гуманитар ташкилотларнинг Исроилдаги фаолият муддати тугагани эълон қилганди. Ташкилотларни янгилаш ва фаластинлик ходимларнинг шахсий маълумотлари акс этган рўйхатларни тақдим этиш учун 60 кун муҳлат берилган.

Шунга мувофиқ, ташкилотлар фаластинлик ходимлари ҳақида маълумот бермаса, 1 мартдан бошлаб фаолиятини тўхтатиши керак бўлади.

Ташкилотларнинг Исроил буйруқларига риоя этолмаслигига бир қанча сабаблар бор:

• фаластинлик ходимларнинг маълумотларини ошкор қилиш уларнинг ҳаётини хавф остига қўяди;
• гуманитар бетарафлик тамойилига путур етади;
• Европанинг маълумотларни ҳимоя қилиш тўғрисидаги қонунчилиги бузилиши мумкин.

Судга юборилган илтимосномада ҳам гуманитар ташкилотларни можаро иштирокчиси учун ахборот йиғиш воситачисига айлантириш бетарафлик тамойилига мутлақо зид эканлиги айтилган.

Ёрдам гуруҳлари ўзларининг қўшма баёнотида уларнинг фаолиятини тўхтатиш юз минглаб муҳтож одамлар учун “гуманитар инқироз ва тузатиб бўлмас талафот”га олиб келишини айтди.

Исроилнинг икки йилдан кўпроқ давом этган уруши салмоқли ҳудудни вайрон қилди. Натижада Ғазодаги 2 миллиондан ортиқ аҳоли озиқ-овқат, сув, соғлиқни сақлаш, бошпана ва бошқа зарур эҳтиёжлар учун ёрдам ташкилотларига таянмоқда.

Мурожаатчиларнинг айтишича, улар Исроил расмийларига ходимлар рўйхатини топшириш ўрнига бошқа муқобил вариантларни, жумладан, “донорлар томонидан текшириладиган аудит тизимлари”ни таклиф қилишган.

2023 йил 7 октабрда Исроилнинг Ғазодаги геноцид уруши бошланган. БМТ маълумотига кўра, шундан бери Ғазо секторида Исроил ҳужумлари оқибатида 133 нафар нодавлат нотижорат ташкилотлар ходими, шунингдек, 15 та MSF ходими ҳалок бўлган.

Бундан ташқари, 2025 йилда дунё миқёсида журналистларнинг ўлими рекорд даражага етди. Хусусан, Исроил мудофаа кучларининг ҳаракати натижасида 86 нафар журналист бевақт ҳалок бўлган.

Муаллиф: Исомиддин Жуманазаров