Ҳонгконгда ёнғин қурбонлари камида 94 нафарга етди, ўт ўчирувчилар иккинчи кун ҳам ёнғин билан курашмоқда

Қорайиб кетган минораларда қутқарувчилар фонар ёруғида хонама-хона юриб, тирик қолганларни излади. Айрим ойналардан тутун чиқишда давом этди. Wang Fuk Court мажмуаси минглаб аҳоли яшайдиган зич турар-жой ҳудуди ҳисобланади.

Расмийларга кўра, ўт ўчирувчилар ҳали ҳам бир неча хонадонда иш олиб бормоқда ва еттита миноранинг барча хоналарига кириб, янги қурбонлар йўқлигини текширишмоқда.

Ҳозирча қанча одам бедарак экани аниқ эмас. Ҳонгконг етакчиси Жон Лининг хабар беришича, пайшанба куни эрталаб ҳолатида 279 киши билан алоқа узилган. Айни пайтда расмийлар янгиланган рақамларни билдирмади.

Айрим хоналарда қидирувчилар қоронғуда излашда давом этди. Бир неча ойна ортида ҳали ҳам олов кўринган бўлса-да, бутун мажмуа асосан куйиб кетган қора вайроналарга айланган.

Ёнғин чоршанба куни тушдан кейин бошлангани, у аввало бамбук тўрлари ва қурилиш қопламаларида келиб чиққан бўлиши мумкинлиги айтилмоқда. Олов комплексдаги саккиз бинодан еттитасига тарқалди.

Чаннинг айтишича, ёнғин «жуда тез» ёйилган. Қутқарувчилар бино ичига киришда қийинчиликка учраган — юқори қаватлардан конструкциялар тушиб, йўлларни тўсиб қўйган, ҳарорат юқори, қоронғи муҳит эса ишни қийинлаштирган.

70 дан зиёд одам яраланган, улар орасида 11 нафар ўт ўчирувчи ҳам бор. Тахминан 900 киши тун давомида вақтинча жойларга эвакуация қилинди.

Ёнғинга боғлиқ равишда қурилиш компаниясининг уч ходими — директорлар ва муҳандис маслаҳатчиси — эҳтиётсизлик орқали одам ўлимига сабаб бўлиш гумони билан қўлга олинди. Полиция компания номини ошкор қилмади.

Маълум қилинишича, қурилишга масъул Prestige Construction & Engineering компанияси офисида қидирув ўтказилган, ҳужжатлар мусодара қилинган. Бино ташқи деворларидаги баъзи материаллар ёнғинга чидамли стандартларга жавоб бермаган бўлиши мумкинлиги айтилди. Шунингдек, ўта ёнувчан пенопласт панеллари ҳам топилган.

Комплекс 1980-йилларда қурилган бўлиб, тахминан 4 800 аҳоли яшайдиган 2 000 га яқин хонадондан иборат. У қайта таъмирланиш жараёнида бўлган. Гонгконгнинг коррупцияга қарши хизмати таъмирлаш лойиҳасида коррупция аломатлари бўйича суриштирув бошлаганини билдирди.

Ёнғин 1996 йилдан буён Гонгконгда содир бўлган энг ҳалокатли ёнғин бўлди. 1996 йил ноябрида Коулундаги савдо биносида юз берган ёнғинда 41 киши ҳалок бўлган эди.