Hongkongda yongʻin qurbonlari kamida 94 nafarga yetdi, oʻt oʻchiruvchilar ikkinchi kun ham yongʻin bilan kurashmoqda

Qorayib ketgan minoralarda qutqaruvchilar fonar yorugʻida xonama-xona yurib, tirik qolganlarni izladi. Ayrim oynalardan tutun chiqishda davom etdi. Wang Fuk Court majmuasi minglab aholi yashaydigan zich turar-joy hududi hisoblanadi.

Rasmiylarga koʻra, oʻt oʻchiruvchilar hali ham bir necha xonadonda ish olib bormoqda va yettita minoraning barcha xonalariga kirib, yangi qurbonlar yoʻqligini tekshirishmoqda.

Hozircha qancha odam bedarak ekani aniq emas. Hongkong yetakchisi Jon Lining xabar berishicha, payshanba kuni ertalab holatida 279 kishi bilan aloqa uzilgan. Ayni paytda rasmiylar yangilangan raqamlarni bildirmadi.

Ayrim xonalarda qidiruvchilar qorongʻuda izlashda davom etdi. Bir necha oyna ortida hali ham olov koʻringan boʻlsa-da, butun majmua asosan kuyib ketgan qora vayronalarga aylangan.

Yongʻin chorshanba kuni tushdan keyin boshlangani, u avvalo bambuk toʻrlari va qurilish qoplamalarida kelib chiqqan boʻlishi mumkinligi aytilmoqda. Olov kompleksdagi sakkiz binodan yettitasiga tarqaldi.

Channing aytishicha, yongʻin «juda tez» yoyilgan. Qutqaruvchilar bino ichiga kirishda qiyinchilikka uchragan — yuqori qavatlardan konstruksiyalar tushib, yoʻllarni toʻsib qoʻygan, harorat yuqori, qorongʻi muhit esa ishni qiyinlashtirgan.

70 dan ziyod odam yaralangan, ular orasida 11 nafar oʻt oʻchiruvchi ham bor. Taxminan 900 kishi tun davomida vaqtincha joylarga evakuatsiya qilindi.

Yongʻinga bogʻliq ravishda qurilish kompaniyasining uch xodimi — direktorlar va muhandis maslahatchisi — ehtiyotsizlik orqali odam oʻlimiga sabab boʻlish gumoni bilan qoʻlga olindi. Politsiya kompaniya nomini oshkor qilmadi.

Maʼlum qilinishicha, qurilishga masʼul Prestige Construction & Engineering kompaniyasi ofisida qidiruv oʻtkazilgan, hujjatlar musodara qilingan. Bino tashqi devorlaridagi baʼzi materiallar yongʻinga chidamli standartlarga javob bermagan boʻlishi mumkinligi aytildi. Shuningdek, oʻta yonuvchan penoplast panellari ham topilgan.

Kompleks 1980-yillarda qurilgan boʻlib, taxminan 4 800 aholi yashaydigan 2 000 ga yaqin xonadondan iborat. U qayta taʼmirlanish jarayonida boʻlgan. Gongkongning korrupsiyaga qarshi xizmati taʼmirlash loyihasida korrupsiya alomatlari boʻyicha surishtiruv boshlaganini bildirdi.

Yongʻin 1996 yildan buyon Gongkongda sodir boʻlgan eng halokatli yongʻin boʻldi. 1996 yil noyabrida Koulundagi savdo binosida yuz bergan yongʻinda 41 kishi halok boʻlgan edi.