Исроил Global Sumud флотилиясига ҳужум қилди

Баёнотга кўра, бу ҳодиса «гуманитар ташкилотларнинг қуролсиз ходимларига қарши ноқонуний ҳужум» ҳисобланади.

Делегациянинг таъкидлашича, Исроил аввал кемалар билан алоқани узиб, ёрдам чақириш сигналига тўсқинлик қилган.

Ҳозирда флотилия Ғазо соҳилидан 60 денгиз милларида ҳаракатланишда давом этмоқда. Баёнотда халқаро ҳамжамиятдан ходимларнинг хавфсизлигини таъминлаш ва уларни озод этиш чораларини кўриш талаб қилинди.

Исроил давлат телеканали KAN мухбирининг хабар беришича, Исроил ҳарбийлари «Sirus», «Alma», «Spectre», «Huga», «Adara» ва «Deyr Yassin» кемаларига ҳужум қилган.

Турк фаоли Яшар Явузнинг «Анадолу» агентлигига маълум қилишича, учта кемага ҳужум қилинган ва фаоллар қўлга олинган. Айни вақтда қолган кемалар Ғазо йўналишида ҳаракатланишда давом этмоқда.

Флотилия вакили Юнус Эмре Айдинбашнинг таъкидлашича, барча иштирокчиларнинг руҳий аҳволи яхши ва улар соғ-саломат.

Global Sumud — гуманитар ёрдам юкланган йирик халқаро флотилия бўлиб, унинг бортида дори-дармон ва бошқа воситалар мавжуд. «Sumud» сўзи арабчада «матонат, собитқадамлик» деган маънони англатади ва Фаластин қаршилигининг рамзларидан бири ҳисобланади.