Isroil Global Sumud flotiliyasiga hujum qildi

Bayonotga koʻra, bu hodisa «gumanitar tashkilotlarning qurolsiz xodimlariga qarshi noqonuniy hujum» hisoblanadi.

Delegatsiyaning taʼkidlashicha, Isroil avval kemalar bilan aloqani uzib, yordam chaqirish signaliga toʻsqinlik qilgan.

Hozirda flotiliya Gʻazo sohilidan 60 dengiz millarida harakatlanishda davom etmoqda. Bayonotda xalqaro hamjamiyatdan xodimlarning xavfsizligini taʼminlash va ularni ozod etish choralarini koʻrish talab qilindi.

Isroil davlat telekanali KAN muxbirining xabar berishicha, Isroil harbiylari «Sirus», «Alma», «Spectre», «Huga», «Adara» va «Deyr Yassin» kemalariga hujum qilgan.

Turk faoli Yashar Yavuzning «Anadolu» agentligiga maʼlum qilishicha, uchta kemaga hujum qilingan va faollar qoʻlga olingan. Ayni vaqtda qolgan kemalar Gʻazo yoʻnalishida harakatlanishda davom etmoqda.

Flotiliya vakili Yunus Emre Aydinbashning taʼkidlashicha, barcha ishtirokchilarning ruhiy ahvoli yaxshi va ular sogʻ-salomat.

Global Sumud — gumanitar yordam yuklangan yirik xalqaro flotiliya boʻlib, uning bortida dori-darmon va boshqa vositalar mavjud. «Sumud» soʻzi arabchada «matonat, sobitqadamlik» degan maʼnoni anglatadi va Falastin qarshiligining ramzlaridan biri hisoblanadi.