Исроил яна Ғазога ҳужум қилди

Ғазо соғлиқни сақлаш расмийларининг маълум қилишича, Исроилнинг Ғаза шаҳрига уюштирган ҳужумлари оқибатида тунги зарбаларда камида 34 киши ҳалок бўлган. Исроил очарчилик гирдобида қолган шаҳарга ҳужумини давом эттирмоқда, шу билан бирга бир қатор давлатлар Фаластин давлатини тан олишга ҳозирланмоқда.

Жасадларнинг аксарияти олиб келинган шифохона мутасаддиларининг айтишича, ҳалок бўлганлар орасида шанба куни кечқурун шаҳарнинг жанубий қисмидаги турар жойга қилинган зарбада ўлган 14 киши ҳам бор. Соғлиқни сақлаш ходимлари ўша зарбада шифохона ҳамшираси, унинг рафиқаси ва уч фарзанди ҳам ҳалок бўлганини билдирди.

Исроил эса бу ҳужумлар юзасидан изоҳ бермади.

Ушбу ҳафтада бошланган Исроилнинг навбатдаги ҳарбий амалиёти минтақада кескинликни янада кучайтирди ва ўт очишни тўхтатиш борасидаги ҳар қандай имкониятни узоқлаштирди. Фаластинликларга шаҳардан чиқишни буюрган Исроил армияси операциянинг аниқ муддатини айтмаган, бироқ бу ойлар давом этиши мумкинлиги айтилмоқда. Исроил бу амалиётни ҲАМАСни гаровдагиларни озод қилиш ва таслим бўлишга мажбурлаш учун қилинаётганини таъкидламоқда.

Шанба кечаси амалга оширилган зарбалар БМТ Бош Ассамблеясида бир қатор Ғарб мамлакатларининг Фаластин давлатини тан олиш режалари арафасида юз берди. Улар орасида Буюк Британия, Франция, Канада, Австралия, Малта, Белгия ва Люксембург бор. Португалия Ташқи ишлар вазирлиги эса якшанба куни Фаластин давлатини тан олишини билдирди.

БМТ йиғилиши арафасида Исроилдаги тинчлик фаоллари Фаластин давлатини тан олиш ташаббусини олқишлади. Якшанба куни яҳудий ва араб ташкилотларидан иборат 60 дан ортиқ гуруҳ — қарийб 1000 нафар фаолларни бирлаштирган “It’s Time Coalition” (Вақти келди коалицияси) — урушни тўхтатиш, гаровдагиларни озод қилиш ва Фаластин давлатини тан олишга чақирди.

“Биз абадий қилич соясида яшашни рад этамиз. БМТ қарори ўлим тузоғидан ҳаётга, туганмас диний урушдан иккала халқ учун ҳам хавфсизлик ва озодлик келажагига ўтиш учун тарихий имкониятни тақдим этмоқда”, — дейилади коалициянинг видеомурожаатида.

Шанба оқшоми Исроилда ўн минглаб одамлар урушга барҳам бериш ва гаровдагилар бўйича келишувни талаб қилиб норозилик намойишига чиқди.

Шунга қарамай, сулҳ ҳануз қўл етмас бўлиб қолмоқда. Ўтган 23 ой давомида Исроилнинг бомбардимонлари Ғазада 65 мингдан ортиқ кишини ҳалок қилди, бутун ҳудуднинг катта қисмини вайронага айлантирди, аҳолининг қарийб 90 фоизини кўчиришга мажбур қилди ва оғир гуманитар инқирозни юзага келтирди. Мутахассислар Ғаза шаҳрида очарчилик ҳукмронлигини таъкидламоқда.

Якшанба куни Исроил армияси берган баёнотида Ғаза шаҳрида ҳужум уюштиришга ҳозирлик кўраётган ҲАМАС ҳарбий қаноти мерганларидан бири — Мажид Абу Салмия ўлдирилганини билдирди. Бироқ бунга далил келтирмади.