Исроилда тожикистонлик эркак жосусликда айбланиб қўлга олинди

Исроил полицияси 2 июль куни Россия паспортига эга тожикистонлик шахс ҳибсга олинганини маълум қилди. У жорий йилда бўлиб ўтган уруш пайтида Эрон фойдасига жосуслик қилишда айбланмоқда.

Гумонланувчи Беҳруз Собиржон “Эрон разведка идоралари билан алоқа ўрнатиб, уларнинг бошқаруви остида хавфсизликка оид топшириқларни бажарган бўлиши мумкин.

“Гумонланувчи Эроннинг хорижий агенти билан алоқада бўлганини тергов аниқлади. Унинг хавфсизликка оид фаолияти асосан, “Арслонлар наъраси” уруши даврига тўғри келади. Бу вақтда у Эроннинг оператив ютуқларига ҳамда халқаро майдонда Исроилга қарши мақсадларини илгари суришига ёрдам беришга уринган”, — дейилади Исроил полицияси баёнотида.

Маълум бўлишича, дастлаб Беҳрузга оддий иш таклифи билан алоқага чиқилган. Бироқ у булар Эрон агентлари эканини тезда англаб етса-да, алоқани давом эттирган.

Арслонлар наъраси (Роаринг Lion) – Исроил томонидан АҚШ ва Исроилнинг февраль ойида Эронга қарши бошлаган ҳаво ҳужумларига берилган ном.

Эронга қандай маълумотлар етказган?

"The Times of Israel" нашрининг ёзишича, тожикистонлик эркак эронлик кураторига уруш пайтида Эрон ракеталари келиб тушган жойлар, Тел-Авивдаги минораларнинг координаталари, Ҳайфа портининг суратларини юборган. Бундан ташқари, Исроил шимолидаги хавфсизлик объектини суратга олишга уринган.

Тергов Исроил полицияси, Мудофаа вазирлиги ва Исроилнинг ички хавфсизлик агентлиги бўлган "Shin Bet" томонидан олиб борилган.

Исроил ва Тожикистоннинг бир-бирида элчихоналари мавжуд эмас, бироқ улар минтақавий элчихоналар ва бошқа тармоқлар орқали дипломатик алоқалар ўрнатишган.