Isroilda tojikistonlik erkak josuslikda ayblanib qo‘lga olindi

Isroil politsiyasi 2-iyul kuni Rossiya pasportiga ega tojikistonlik shaxs hibsga olinganini ma’lum qildi. U joriy yilda bo‘lib o‘tgan urush paytida Eron foydasiga josuslik qilishda ayblanmoqda.

Gumonlanuvchi Behruz Sobirjon “Eron razvedka idoralari bilan aloqa o‘rnatib, ularning boshqaruvi ostida xavfsizlikka oid topshiriqlarni bajargan bo‘lishi mumkin.

“Gumonlanuvchi Eronning xorijiy agenti bilan aloqada bo‘lganini tergov aniqladi. Uning xavfsizlikka oid faoliyati asosan, “Arslonlar na’rasi” urushi davriga to‘g‘ri keladi. Bu vaqtda u Eronning operativ yutuqlariga hamda xalqaro maydonda Isroilga qarshi maqsadlarini ilgari surishiga yordam berishga uringan”, — deyiladi Isroil politsiyasi bayonotida.

Ma’lum bo‘lishicha, dastlab Behruzga oddiy ish taklifi bilan aloqaga chiqilgan. Biroq u bular Eron agentlari ekanini tezda anglab yetsa-da, aloqani davom ettirgan.

Arslonlar na’rasi (Roaring Lion) – Isroil tomonidan AQSH va Isroilning fevral oyida Eronga qarshi boshlagan havo hujumlariga berilgan nom.

Eronga qanday ma'lumotlar yetkazgan?

"The Times of Israel" nashrining yozishicha, tojikistonlik erkak eronlik kuratoriga urush paytida Eron raketalari kelib tushgan joylar, Tel-Avivdagi minoralarning koordinatalari, Hayfa portining suratlarini yuborgan. Bundan tashqari, Isroil shimolidagi xavfsizlik obyektini suratga olishga uringan.

Tergov Isroil politsiyasi, Mudofaa vazirligi va Isroilning ichki xavfsizlik agentligi bo‘lgan "Shin Bet" tomonidan olib borilgan.

Isroil va Tojikistonning bir-birida elchixonalari mavjud emas, biroq ular mintaqaviy elchixonalar va boshqa tarmoqlar orqali diplomatik aloqalar o‘rnatishgan.