Айрим Исроил амалдорлари урушни чўзмоқчи — АҚШ вице-президенти

АҚШ вице-президенти Жей Ди Венс 15 июль куни бошловчи Жо Роган билан бўлиб ўтган подкастда айтишича, Исроил ҳукуматининг айрим вакиллари АҚШ жамоатчилигини Эрон билан урушни якунлаш бўйича келишувга қарши чиқишга ундаган.

Венс аввалги чиқишларида ҳам Исроил ҳукумати сиёсатини танқид остига олган. Кўпчилик уни келажакда президентликка эҳтимолий номзод сифатида кўради. АҚШ ва Исроил ўртасидаги очиқ келишмовчилик эса тобора ошиб бормоқда.

Венс ўтган ой Эрон билан урушни тўхтатиш бўйича эришилган келишувни ҳимоя қилди.

АҚШ ва Исроилдаги танқидчилар ушбу келишув Эроннинг ракета дастурини чекламаганини, ядро иншоотлари ёпилишини назарда тутмаганини ҳамда Исроилнинг Ливандаги “Ҳизбуллоҳ” ҳаракатига қарши ҳарбий амалиётларини чеклаб қўйганини таъкидламоқда.

“Мен шубҳасиз биламанки, Исроил ҳукумати ичида АҚШни ушбу келишувдан қайтаришга уринаётганлар бор. Чунки улар ҳарбий ҳаракатни давом эттиришни истайди”, — деди Венс.

Вице-президентнинг айтишича, у Исроил ҳукуматининг айрим аъзолари билан яхши муносабатда. Бироқ уларнинг парламентида АҚШ жамоатчилик фикрини ўзгартириш ва урушни номаълум муддатга чўзишга уринаётган шахслар ҳам борлиги ҳақиқат.

Венс июнь ойида ҳам Эрон бўйича келишувни танқид қилган Исроил вакилларига кескин жавоб қайтарган эди. У президент Доналд Трампни Исроилнинг ягона ҳақиқий иттифоқчиси деб атаб, АҚШ Исроилга миллиардлаб доллар мудофаа ёрдами кўрсатишини эслатган.

Исроилнинг юқори мартабали амалдорлари аноним тарзда келишув шартлари Исроил манфаатларига мос эмаслигини билдирган. Уларнинг фикрича, ҳужжатда Эроннинг ядро ва баллистик ракета дастурлари билан боғлиқ асосий хавотирлар инобатга олинмаган.

Венсдан, агар Исроилнинг таъсири бўлмаганида АҚШ Эрон билан сўнгги урушда иштирок этармиди, деб сўралганда, у: “Менинг фикримча, ҳа, албатта”, — деб жавоб берди.

“Президент Исроилнинг ҳар қандай таъсиридан қатъи назар, Эрон ядро қуролига эга бўлмаслиги керак, деган позицияда. Мен ҳам бунга қўшиламан”, — деди Венс.