“Бутун Ливан ёниши, минглаб ливанлик оналар йиғлаши керак” – Итамар Бен Гвир

Исроил ҳарбийларининг маълум қилишича, аскарлар Ливандаги операция вақтида уларнинг танкига берилган зарба оқибатида “жангда” ҳалок бўлган.

Ҳалок бўлганлардан бири 401-зирҳли бригаданинг 52-баталёни қўмондони, 32 ёшли подполковник Дор Гедалия Бен Симхон экани айтилди.

Исроил Мудофаа кучлари тунда Ливан жануби бўйлаб “Ҳизбуллоҳ” жангарилари ва инфратузилмасини нишонга олиб, зарбалар берганини маълум қилди. Бугун эрталаб ҳолатига кўра, зарбалар оқибатида 18 киши ҳалок бўлган.

“Исроиллик онанинг ҳар бир томчи кўз ёши учун минглаб ливанлик оналар йиғлаши, бутун Ливан ёниши керак!”, – деб ёзди Итамар Бен-Гвир Х'даги постида.

“Етар энди, бу “пинг-понг”ни бас қилинг. Яқин Шарқда вазминлик ва босиқлик билан ғалаба қозониб бўлмайди – бу ерда ғазабланиш керак. Йўқ қилиб ташлаш шарт. Террорни янчиб ташланг”, – деган у пост охирида.

Ҳаракатлар АҚШ-Эрон келишувига зид

Бу воқеа АҚШ ва Эрон раҳбарлари Эрон урушини тугатишга қаратилган дастлабки келишувни имзолаганидан бир неча кун ўтиб юз берди.

Вақтинчалик келишув шартларига кўра, ҳар икки томон ва уларнинг иттифоқчилари барча ҳарбий ҳаракатларни, жумладан, Ливандаги ҳаракатларни ҳам тўхтатиши шарт.

“Америкаликларни ҳурмат қилган ҳолда айтаманки, Исроил бутун дунёга фарзандларимиз қони ва фуқароларимиз хавфсизлиги қурбон қилинмаслигини аниқ-равшан билдириб қўйиши керак”, - деди Бен-Гвир.

Бен-Гвир май ойида Ғазога ёрдам етказишга уринган “Глобал Сумуд флотилияси”нинг ҳибсга олинган фаолларини масхара қилаётгани акс этган видеолавҳани эълон қилиб, баҳс-мунозараларга сабаб бўлган эди.

Видеода вазирнинг ҳибсга олинганларни ҳақоратлаб, Исроилнинг катта байроғини силкитаётгани, фаоллар эса қўллари орқасига боғланган ҳолда тиз чўкишга мажбурлангани акс этган. “Исроилга хуш келибсиз, бу ернинг хўжайинлари бизмиз” дейди у лавҳада.

Аввалроқ, Итамар Бен Гвирнинг Италияни “шиппаклар мамлакати”га ўхшатиб камситгани ҳақида хабар бергандик.