Ливанда ҳаво зарбаси: қурбонлар сони 2000 дан ошди

Маълумотларга кўра, ҳодиса қизалоқнинг отаси дафн маросими ўтказилаётган вақтда содир бўлган. Зарба айнан оиланинг уйи жойлашган ҳудудга берилган.

Жанубий Ливандаги Срифа қишлоғида амалга оширилган ҳаво зарбаси оқибатида 1,5 ёшли қизалоқ ва унинг бир нечта қариндошлари ҳалок бўлди. Бу ҳақда халқаро манбалар хабар бермоқда.

Маълум қилинишича, ҳодиса қизалоқнинг отаси дафн маросимида иштирок этаётган вақтда содир бўлган. Зарба оиланинг уйи жойлашган ҳудудга тўғри келган.

Ҳалок бўлган қизалоқнинг исми Талин Саид экани аниқланган. Унинг 7 ёшли опаси тирик қолган, бироқ оғир тан жароҳатлари билан шифохонага ётқизилган.

Исроил ҳарбийлари ушбу ҳолат юзасидан етарли маълумот йўқлигини билдириб, ҳодисани текшириш учун қўшимча маълумотлар талаб этилишини маълум қилди. Шунингдек, улар “Ҳизбуллоҳ”га қарши зарбаларда тинч аҳолига зарар етказмаслик чоралари кўрилишини таъкидлади.

Сўнгги маълумотларга кўра, Ливандаги сўнгги можаро 2 март куни “Ҳизбуллоҳ” томонидан Исроил позицияларига ўт очилиши ортидан бошланган. Шундан сўнг Исроил томонидан ҳаво ва қуруқликдаги ҳарбий амалиётлар кучайтирилган.

Ҳозирга қадар ушбу амалиётлар оқибатида 2000 дан ортиқ киши ҳалок бўлган. Улар орасида 165 нафар бола ва қарийб 250 нафар аёл борлиги қайд этилмоқда.

Католик черкови раҳбари Папа Лео Ливан халқига ҳамдардлик билдириб, зудлик билан ўт очишни тўхтатишга чақирди. Унинг таъкидлашича, тинч аҳолини урушнинг даҳшатли оқибатларидан ҳимоя қилиш “ахлоқий мажбурият” ҳисобланади.

Минтақадаги вазият ҳали ҳам кескинлигича қолмоқда ва сулҳга эришиш бўйича музокаралар самара бермаяпти.