Трампнинг иқтисодий изоляцияси АҚШга «навбатдаги мағлубиятни» олиб келади – Аббос Ароқчи

Эрон ташқи ишлар вазири Аббос Ароқчининг 20-август куни айтишича, АҚШ президенти Дональд Трампнинг Теҳронга қарши эълон қилган янги «Иқтисодий D-куни» кампанияси Вашингтонга яна бир мағлубият келтириб, эронликларнинг АҚШга нисбатан нафратини кучайтиради.

«Иқтисодий D-куни» деб аталаётган нарса Американинг ўз инқирозидан – мисли кўрилмаган қарз ва ошиб бораётган фоиз харажатларидан чалғитишга уринишдир. Муваффақиятсиз сиёсатни янада кучайтириш навбатдаги мағлубият ва эронликларнинг адоватига сабаб бўлади», – деб ёзди Ароқчи X ижтимоий тармоғида.

Шунингдек, АҚШнинг «иқтисодий терроризм» деб атаган ҳаракатлари жаҳон иқтисодиёти ҳамда бутун дунё суверенитетига таҳдид солаётганини қўшимча қилди.

Унинг бу сўзлари Трамп 19-август куни янги чорасини «мисли кўрилмаган кўламдаги иқтисодий уруш ва изоляция» деб атаб, уни бирор бир мамлакатга қарши амалга оширилган энг кучли иқтисодий операция дея таърифлаганидан сўнг янгради.

«Бирон-бир мамлакат молия муассасалари, корхоналари, аэропортлари ёки давлат идораларига Эронни қандайдир шаклда қўллаб-қувватлашга рухсат берса, ўша давлат ҳам қақшатқич иқтисодий оқибатларга дучор бўлади», — деди Трамп.

Трамп ушбу кампанияни «Иқтисодий D-куни» деб атаб, АҚШ иттифоқчиларини ҳам Эронни яккалашда Вашингтонга қўшилишга ундади.