Украина бу йил 700 квадрат километр ҳудудини қайтариб олди

Бош қўмондон Олександр Сирский олий ҳарбий лавозимни тарк этиб, истеъфога чиқаётганини маълум қилар экан, Украина жорий йилда ўзининг 700 квадрат километр ҳудудини қайтариб олганини айтди.

“Мен ўрнимга келадиган одамга нафақат мудофаани ушлаб турган, балки ҳужум ҳам қилаётган армияни қолдиряпман”, – деди Сирский Тelegram'даги баёнотида.

Бир неча кун давом этган намойишлардан сўнг, Президент Володимир Зеленский 21 июль куни Сирскийнинг ўрнини ёш генерал-майор Михайло Драпатий эгаллашини айтди.

Бу воқеа ўтган ҳафта ҳукуматдаги кенг кўламли ўзгаришлар доирасида мудофаа вазири Михаило Федоровнинг лавозимидан четлатилиши ортидан юз берди.

Сирский 2024 йил бошидан бери Бош қўмондон лавозимида ишлаб келади. У урушнинг дастлабки кунларида Киев мудофаасида ҳамда 2022 йилда Харков вилоятининг шимоли-шарқий ҳудудларини қайтариб олишга қаратилган тезкор қарши ҳужумда муҳим роль ўйнаган.

Бироқ Сирский қаттиққўллиги учун кескин танқидга учраган. Баъзи ҳарбийларнинг айтишича, унинг бу  услуби қўшинлар орасида ҳаддан ташқари кўп йўқотишларга сабабчи бўлган.

Сирский баёнотида Россиянинг Харков вилоятидаги ҳужумини тўхтатгани ва 2024 йилда Россиянинг Курск вилоятидаги операцияси каби ютуқларини алоҳида таъкидлаб ўтди.