Эбола Европада: Францияда илк касаллик ҳолати тасдиқланди

Конго Демократик Республикасидаги гуманитар миссиядан Францияга қайтган шифокорнинг Эбола вирусига чалингани тасдиқланди, деб хабар қилди давлат Соғлиқни сақлаш вазирлиги.

Бу Марказий Африкада авж олган ҳозирги эпидемия бошланганидан бери Европа ҳудудида қайд этилган биринчи ҳолатдир.

Маҳаллий юқиш хавфини чеклаш мақсадида Франция ҳукумати бемор билан мулоқотда бўлган ҳар бир шахсни аниқлаш учун эпидемиологик суриштирув бошлади.

“Минтақавий соғлиқни сақлаш агентлиги бу одамларга зудлик билан боғланади, улар 21 кун давомида яккаланиб, қатъий назорат остида бўлади", — дея қўшимча қилди вазирлик.

Шунингдек, аҳоли учун хавф даражаси “жуда паст” эканини таъкидланди.

Конгодаги вазият

Май ойи ўрталарида касаллик авж олгани расман эълон қилинганди. Шундан бери 1000 дан ортиқ ҳолат тасдиқланиб, камида 260 киши вафот этди.

Касалликни Эбола вирусининг кам учрайдиган Bundibugyo штамми келтириб чиқаради ва ҳозирда унга қарши тасдиқланган вакцина ёки даво мавжуд эмас.

Соғлиқни сақлаш идоралари эпидемиянинг ўчоғи бўлган Итури провинциясида вирус тарқалишини жиловлашга уринмоқда. Бу ерда қуролли тўқнашувлар билан боғлиқ ҳаракат тиббий гуруҳлар ишини қийинлаштирмоқда.

Жаҳон соғлиқни сақлаш ташкилоти инқироз бутун минтақага тарқалиши мумкинлигидан хавотир билдирди, чунки қўшни Угандада аллақачон бир нечта ҳолат қайд этилган.