Оқ Уй Трампнинг Ғазо бўйича тинчлик режасини эълон қилди. Трамп Ғазони ўзи бошқармоқчи

Дастурга кўра, Исроил қўшинларини Ғазодан олиб чиқиши ва ҳарбий ҳаракатларини музлатиб қўйиш эвазига гаровга олинган исроилликларни озод қилиши керак.

Исроил таклиф қилинган келишувни тан олганидан сўнг, гаровдагиларни озод қилиш учун 72 соат вақт берилади.

Шунингдек, асирликдаги барча исроилликлар озод қилинганидан сўнг, Исроил умрбод қамоққа ҳукм қилинган 250 кишини ҳамда 2023 йил 7 октябрдан кейин ҳибсга олинган 1700 нафар ғазоликни озод қилиши керак бўлади.

Тинчлик режасига кўра, Ғазо “терроризмдан тозаланган” ҳудудга айлантирилади ва қайта қурилади. Бу келишувда ҲАМАС Ғазодаги бошқарувда иштирок этмаслиги шарт этиб белгиланади.

Ғазони бошқариш учун «Фаластин қўмитаси» деб номланган вақтинчалик ҳукумат тузилади. У халқаро «Тинчлик кенгаши» назорати остида ишлайди ва унинг раҳбари Трамп бўлади.

Келишув имзоланганидан сўнг Ғазога зудлик билан халқаро гуманитар ёрдам, шу жумладан инфратузилмани тиклаш учун ёрдам юборилади.

АҚШ араб давлатлари ва бошқа халқаро ҳамкорлар билан биргаликда Ғазо учун вақтинчалик Халқаро барқарорлаштирувчи кучларни ташкил этишда иштирок этади.

Тинчлик режасига кўра, Исроил анклавни босиб олмайди ва аннексия қилмайди.

Трамп ва Нетаняҳу учрашувида Нетаняҳу ушбу шартга рози эканлигини айтди. Тинчлик дастурини энди Фаластин давлати ҳам тасдиқлаши керак бўлади. Агар шундай бўлса Трамп бошчилигидаги гуруҳ тузилади ҳамда Ғазони бошқара бошлайди.