Покистон собиқ бош вазири Имрон Хон қамоқдан шифохонага ўтказилмоқда

Покистон Олий суди собиқ бош вазир Имрон Хоннинг соғлиғи ёмонлашгани ҳақидаги адвокатларнинг даъволаридан сўнг, уни тиббий кўрик учун шифохонага ўтказишни буюрди.

Судья Шаҳид Воҳиднинг сўзларига кўра, коррупция айбловлари билан 2023 йилдан буён қамоқда сақланаётган 73 ёшли Хон яқин икки кун ичида пойтахт Исломободдаги “Shifa International” шифохонасига кўчирилади.

Ўтган йил охирида Хон ва унинг рафиқаси 17 йиллик қамоқ жазосига ҳукм қилинган эди.

Хон жорий йилда шифохонада кўзидан муолажа олган, оиласи ва адвокатининг таъкидлашича, у ўнг кўзининг кўриш қобилиятини деярли йўқотган.

Покистон крикет жамоасининг собиқ сардори бўлган Хон 2018 йилдан 2022 йилгача бош вазир лавозимида ишлаган, сўнгра унинг ҳукумати ва Покистоннинг қудратли ҳарбийлари ўртасидаги зиддиятлар фонида юзага келган сиёсий инқироз туфайли ишончсизлик вотуми билан лавозимидан четлатилган эди.

Шундан сўнг у коррупция ва бошқа айбловлар бўйича бир неча бор судланди.

Хон ва унинг “Покистон Теҳрик-и-Инсоф” партияси унга қарши очилган ишлар сиёсий сабабларга асосланганини таъкидламоқда.

Унинг ҳибсга олиниши 2023 йил май ойида мамлакат миқёсида норозилик намойишларига сабаб бўлди ва уларнинг айримлари зўравонликка айланиб, юзлаб одамларнинг қўлга олиниши билан якунланди.