Покистон шифохонасида юзага келган ёнғин оқибатида 14 нафар чақалоқ ҳалок бўлди

Ёнғин 26 август куни Покистон Тиббиёт фанлари институти (PIMS) касалхонасининг она ва бола саломатлиги бўлимида юз берган.  Дастлабки маълумотларга кўра, ёнғин кондиционер қурилмасидаги носозлик сабабли бошланган ва кислород найлари орқали тезда алангаланган.

Воқеа содир бўлган пайтда бўлимда 15 нафар чақалоқ бўлган, улардан фақат биттаси қутқарилган.

Ёнғин сабабларини аниқлаш бўйича текширув бошланган. Тузилган комиссияга 24 соат ичида ҳисобот тайёрлаш топширилган.

Сенатор: тиббиёт марказларида хавфсизликни яхшилаш "шошилинч зарурат"

Pakistan Associated Press (APP) маълумотига кўра, Покистон сенаторлари PIMS туғруқхонасидаги ёнғиндан сўнг касалхоналарда хавфсизлик чораларини кучайтиришни талаб қилмоқда.

Сенат раиси ўринбосари Сайидал Хон Носир тиббиёт марказларида хавфсизлик тизимларини модернизация қилиш "шошилинч зарурат" эканини таъкидлади. У шунингдек ёнғин ҳодисаларининг олдини олиш учун хавфсизлик тизимларини мунтазам текшириб туриш ва бу борада "аниқ чоралар кўриш" зарурлигини айтди.

Сенат раиси Саид Юсуф Ризо Гилани касалхоналарда "самарали хавфсизлик чоралари, тўлақонли ёнғин хавфсизлиги тизимлари ва барча зарур фавқулодда чора-тадбирлар" мавжуд бўлиши шарт эканини билдирди. У хавфсизлик чораларидаги ҳар қандай эътиборсизлик ёки нуқсонни "йўл қўйиб бўлмайдиган ҳолат" деб атаб, тегишли идораларни ёнғин бўйича "пухта ва шаффоф" текширув ўтказишга чақирди.