Покистондаги кўмир конида юз берган портлашда 34 киши ҳалок бўлди

Покистоннинг жанубидаги кўмир конида юз берган портлаш оқибатида камида 34 нафар кончи ҳалок бўлди. 

Вилоят фавқулодда вазиятлар бошқармаси 31 июль куни маълум қилишича, қутқарувчилар бедарак йўқолган бошқа кончиларни қидиришда давом этмоқда.

Дастлабки маълумотларга кўра, портлашга метан газининг тўпланиши сабаб бўлган. Ҳодиса 30 июль куни табиий ресурсларга бой Балужистон вилояти маркази яқинидаги кўмир конида юз берди.

Балужистон вилояти Фавқулодда вазиятларни бошқариш бошқармаси берган баёнотида 34 нафар кончининг жасади топилганини маълум қилди. Аммо портлаш пайтида конь ичида қанча одам бўлгани очиқланмади.

Гувоҳларга кўра, портлаш овозини эшитгач, яқин атрофдаги кончилар ичкарида қолган ишчиларни қутқариш учун шахтага тушган.

Аҳмад Зада исмли кончининг айтишича, портлашдан кейин қутқарув учун шахтага тушган кончилар ҳам ҳалок бўлган.

Ҳудуди жиҳатидан Покистоннинг энг йирик, аммо энг камбағал вилояти ҳисобланган Балужистон таълим, бандлик ва иқтисодий ривожланиш каби кўрсаткичлар бўйича ортда қолган. Шунга қарамай, вилоят кўмир, олтин ва мис захираларига бой.