Қирғизистон БМТ Хавфсизлик кенгашининг вақтинчалик аъзоси этиб сайланди

Қирғизистон тўртинчи турда 142 та овоз тўплаб, Осиё-Тинч океани минтақаси давлатлари гуруҳидан бир ўринга даъвогарлик қилган Филиппинни ортда қолдирди.

Бугунги сайловлар якунига кўра:

• Ғарбий Европа ва бошқа давлатлар гуруҳидан Австрия ва Португалия;
• Лотин Америкаси ва Кариб ҳавзаси мамлакатлари гуруҳидан Тринидад ва Тобаго;
• Африка давлатлари гуруҳидан Зимбабве Хавфсизлик Кенгаши таркибига киради. 

Сайланиш учун мамлакатлар аъзо давлатлар умумий овозларининг учдан икки қисмини, яъни 127 тасини қўлга киритиши керак эди.

Хавфсизлик Кенгаши таркибига 15 та мамлакат киради. Улардан бештаси – Буюк Британия, Хитой, Россия, АҚШ ва Франция вето ҳуқуқига эга доимий аъзолардир. Яна ўнта мамлакат икки йил муддатга сайланади. 

2026 йил охирида бешта доимий бўлмаган аъзо – Греция, Дания, Покистон, Панама ва Сомалининг ваколат муддати тугайди. Уларнинг ўрнини бугун сайланган давлатлар эгаллайди.

Халқаро тинчлик ва хавфсизликни сақлаш асосий масъулияти Хавфсизлик Кенгаши зиммасидадир. Баъзи ҳолларда Хавфсизлик Кенгаши халқаро тинчлик ва хавфсизликни сақлаш ёки тиклаш мақсадида санкцияларни қўллаши, ҳатто, куч ишлатишга рухсат бериши мумкин.