Қобилжоннинг ўлимидан сўнг, онаси ва укаси қандай яшамоқда?

«Asia-Plus» нашрига яқин манбанинг маълум қилишича, айни пайтда она ва боланинг аҳволи қониқарли. Улар давлат томонидан пойтахтда ҳадя этилган квартирага кўчиб ўтишга қарор қилган.

«Квартира она номига расмийлаштирилди, барча ҳужжатлар тартибга келтирилди, иш жойи ҳам белгилаб қўйилди. Аҳволлари бироз яхшилангач, янги уйга кўчиб ўтишади», — деди манба.

Маълум қилинишича, мамлакат тадбиркорларидан бири Кобилжон Алиевнинг онасини ойига 1000 АҚШ доллари маош билан иш жойи билан таъминлаш мажбуриятини ўз зиммасига олган.

Шу билан бирга, Нилуфар Сафарова ҳозирча оммавий ахборот воситалари билан мулоқот қилишдан бош тортмоқда.

Кобилжоннинг укаси таҳсил олаётган таълим муассасаси «Asia-Plus» таҳририятига маълум, аммо бола хавфсизлиги нуқтаи назаридан унинг номи ошкор этилмади.

Фожиа тафсилотлари

Эслатиб ўтамиз, Қобилжон Алиев 2025 йил 16 декабрь куни Россиянинг Москва вилоятидаги мактаблардан бирида 15 ёшли ўсмир томонидан пичоқлаб ўлдирилган. Жиноятчи — Россия фуқароси бўлиб, ҳужум миллий нафрат асосида содир этилган.

Ҳужумдан олдин у мактаб қўриқчисини ҳам яралаган, бироқ у тирик қолган. Жиноят жараёни ижтимоий тармоқларда жонли эфирда намойиш этилган.

Тарқалган видеоларда қўлида пичоқ бўлган ўсмир ўқувчилар олдига келиб: «Қайси миллатдансан?» деб сўрагани акс этган. Қотил жиноятдан сўнг мактабнинг ўзидаёқ ҳуқуқни муҳофаза қилувчи органлар томонидан қўлга олинган.

У айбини тан олган. Унга нисбатан Россия Жиноят кодексининг 105-моддаси 3-қисми (қасддан одам ўлдириш) ва 30-модда 2-қисми (суиқасд) бўйича жиноят иши қўзғатилган. Айни пайтда у икки ойлик дастлабки қамоқда сақланмоқда.

Ушбу фожиа Россия жамиятида сўнгги йилларда кучайиб бораётган миллатчилик, мигрантофобия ва шовинизм муҳитининг оқибатидир. Экспертлар фикрича, жазосизлик ва нафратни тарғиб қилувчи ғоялар таъсирида сўнгги 22 йил ичида Россияда камида олти нафар тожик боласи шафқатсизларча ўлдирилган.