Россия нефтидан воз кечаётган Туркия энди Қозоғистонга юзланди

Маълумотларга кўра, АҚШ, Европа Иттифоқи ва Буюк Британиянинг Россия нефть секторига қарши жорий этган санкциялари Туркиянинг импорт сиёсатини ўзгартирган. Шунга қарамай, Туркия ҳозирча Россия нефтини импорт қилувчи йирик давлатлар — Хитой ва Ҳиндистон билан бир қаторда қолмоқда.

Туркиянинг энг йирик нефть қайта ишлаш корхоналаридан бири — Озарбайжоннинг SOCAR давлат компаниясига тегишли STAR заводи яқинда Қозоғистон, Ироқ ва бошқа давлатлардан тўртта партия нефть сотиб олган.

Reuters маълумотларига кўра, етказиб бериш ҳажми кунлик 77 мингдан 129 минг баррелгача баҳоланмоқда. Илгари STAR асосан Россия нефтидан фойдаланган бўлиб, 2024 йилнинг сентябрь–октябр ойларида бу кўрсаткич кунлик 210 минг баррелни ташкил этган.

Манбаларнинг таъкидлашича, тўртинчи партия — Қозоғистонда қазиб олинадиган KEBCO тури нефти бўлиб, у Россиянинг Urals маркасига сифат жиҳатдан яқин. 2025 йилда STAR заводи Қозоғистон нефтини фақат битта партияда импорт қилган, 2024 йилда эса умуман харид қилмаган.

Туркиянинг яна бир йирик нефть қайта ишлаш компанияси — Tupras ҳам Urals нефтига ўхшаш турдаги нефть харидини кўпайтирмоқда. Reuters маълумотларига кўра, ҳозирча етказиб бериш Ироқ, Бразилия ва Анголадан амалга оширилаётган, аммо келгусида Қозоғистон ҳам Tupras учун асосий хомашё манбаига айланиши мумкин.

Айни пайтда Россия нефти Туркиянинг умумий импорт ҳажмининг 47 фоизини ташкил этмоқда. Январ–октябр ойларида мамлакат кунлик 669 минг баррел хом нефть импорт қилган бўлиб, шундан 317 минг баррели Россиядан келтирилган.

Шу билан бирга, Туркия ҳозирда Қозоғистон нефтини импорт қилувчи энг йирик ўнта давлатдан бири ҳисобланади. Туркия Қозоғистонда экспорт қилинаётган умумий нефть ҳажмининг 3 фоизини сотиб олади. 2024 йилда Туркия 2 миллион тонна хом нефть импорт қилган бўлса, 2025 йилда бу кўрсаткичнинг янада ошиши кутилмоқда.