Сомали Абу-Даби билан алоқаларни кескин узди

Расмий Могадишо бу қарорни мамлакат суверенитети ва ҳудудий яхлитлигига таҳдид солувчи ҳаракатлар билан изоҳлади. Бу ҳақда Al Jazeera хабар берди.

Қарор сабаблари очиқланди
 

12 январь куни Сомали Вазирлар Маҳкамаси қарорни расман эълон қилди. Мудофаа вазири Аҳмед Муаллим Фиқий X ижтимоий тармоғидаги баёнотида мазкур қадам БАА томонидан Сомали Республикасининг миллий бирлиги ва сиёсий мустақиллигига зарар етказувчи амалиётлар мавжудлигига оид ишончли маълумотлар асосида қабул қилинганини таъкидлади.

Айни пайтгача БАА расмийлари бу қарорга муносабат билдиргани йўқ.

Сомалиленд атрофидаги геосиёсий қарама-қаршилик

Мустақил таҳлилчи Абдинор Даҳирнинг фикрича, Могадишонинг кескин қадами Исроилнинг 2025 йил декабрь ойида Сомалилендни мустақил давлат сифатида тан олгани ортидан юзага келган вазият билан боғлиқ бўлиши мумкин. Сомалиленд 1991 йилда Сомалидан ажралиб чиққан бўлса-да, халқаро ҳамжамият томонидан расман тан олинмаган.

«Сомали жамоатчилиги орасида БАА Исроилнинг Сомалилендни тан олишига билвосита кўмак берган, деган фикр кенг тарқалган. Ҳукумат қарори айнан шу норозиликнинг сиёсий ифодаси сифатида қабул қилинмоқда», — дейди Даҳир.

Инвестициялар, портлар ва таъсир учун кураш
 

Сўнгги ўн йил ичида Сомалиленд БАА учун Африкадаги муҳим иқтисодий ва логистик нуқтага айланган. Айниқса, DP World компаниясининг Бербера портини бошқариш бўйича 30 йиллик шартномаси стратегик аҳамият касб этади.