Стармер кетди. Британия яна бош вазир излаяпти

Икки йил олдин у катта умид билан келди. 14 йиллик Консерваторлар ҳукумати мамлакатни чарчатиб кетганди — Брексит, пандемия можаролари, бир-бирини қувиб ўзгараётган бош вазирлар. Стармер барқарорлик ваъдаси билан сайловга кирди. Лейбористлар тарихий ғалаба қозонди.

Лекин икки йил — Британия сиёсатида абадийлик.

Иқтисод тузалмади. Касалхоналар, мактаблар ўша аҳволда қолди. Одамлар ваъдаларни эслади, натижаларни кутди — натижа кўринмади. Рейтинг йил сайин эрий борди. Кейин Эпштейн файллари келди.

Эпштейн – Американинг боявой молиячиси, ўнлаб вояга етмаган қизларни истисмор қилгани учун судланган, 2019 йилда қамоқхонада ҳалок бўлган одам. Унинг шахсий архиви оммага чиқарилгач, жаҳон сиёсати силкиниб кетди – чунки у ҳамма билан дўст бўлган: президентлар, шаҳзодалар, вазирлар.

Британиядан Питер Манделсон – Лейборист партиясининг эски тулпори. Ўзи тажрибали, уддабурон, Трамп маъмурияти билан тил топишади деган умидда Стармер уни АҚШ элчиси қилиб юборди. Файллар чиқгач маълум бўлдики, Манделсон Эпштейнни "энг яхши дўстим" деб атаган, у судланганида "кураш, тез чиқиб кет" деб хат ёзган, ҳатто давлат сирларини унга ошириб турган. Стармер Манделсонни ишдан олди – аммо уни умуман тайинлаганлиги учун баҳо тўлади.

Устига устак, маҳаллий сайловлар фожиа билан тугади. Партия ичида норозилик кучайди. Сўнг Энди Бернҳем саҳнага чиқди.

Бернҳем – Манчестер шаҳрини тўққиз йил бошқарган одам. Шимолни – Британиянинг камбағалроқ, эски саноат минтақасини – тиклашга умр бағишлади. Оддий одамлар уни яхши кўради, "Шимол қироли" дейишади. У парламентга қайтиш учун қўшимча сайловга тушди – ва ғалаба қозонди. Бу Стармерга очиқ мусобаша эълони эди.

Бернҳем душанба куни парламентда депутатлик қасамини ичди. Стармер эса ўша тонгда истеъфосини эълон қилди. Собиқ рақиби Уэс Стритинг ҳам Бернҳемни қўллашини айтди. Яъни – тож бериш расмиятчилик, мусобаса бўлмайди деган умид бор.

Бернҳем сентябргача янги бош вазир бўлиши кутилмоқда.

Британия сиёсати шундай – ўн йил ичида мана шу еттинчи бош вазир. Тизим ҳар сафар одамни эзади, кейин янги умид излайди. Бернҳем ўша умид. Лекин микроскоп тагида иш бошланади – ва у ҳам ўша микроскоп тагида.