Трамп телефон орқали Путин ва Зеленский билан суҳбатлашди

14 июнь куни Россия президенти Владимир Путин ва Украина президенти Володимир Зеленский билан алоҳида-алоҳида телефон орқали суҳбатлашди Доналд Трамп.

Путин билан суҳбат

Россия президенти ёрдамчиси Юрий Ушаковнинг журналистларга маълум қилишича, Путиннинг Трамп билан суҳбати бир соатга яқин давом этган.

Ушаковнинг сўзларига кўра, Трамп Украина масаласида ҳарбий ҳаракатларни тўхтатиш зарурлигини таъкидлаб, бу мақсад йўлида Европадаги иттифоқчиларга ва Киевга таъсир ўтказишга тайёрлигини билдирган.

Шунингдек, Трамп Россиядаги тинч аҳоли объектларига берилган сўнгги зарбалар келишувга эришишни мураккаблаштираётганини таъкидлаган. Аммо Оқ уй буни тасдиқламади ва қўнғироқ юзасидан изоҳ бермади.

Ўз навбатида Путин Киевнинг Россия фуқаролик инфратузилмасига ҳужумлари Украинанинг жанг майдонидаги мавқейини ўзгартирмаслигини ва агар Зеленский у билан учрашишни истаса, “Москвага келсин”, деганини маълум қилди Ушаков.

Зеленский билан суҳбат

Зеленский Телеграм орқали эълон қилган баёнотида Трамп билан “ажойиб суҳбат” қурганини таъкидлади.

Украина президенти Трампни туғилган куни билан табриклаш билан бирга, АҚШ президентига Украинани қўллаб-қувватлагани учун миннатдорчилик билдирди.

Зеленскийнинг айтишича, улар тинчликни яқинлаштиришга нима ёрдам бера олишини муҳокама қилган. Шунингдек, Зеленский Трампга Украинанинг шарқий фронт чизиғидаги позициялари яхшиланиб, мустаҳкамланиб бораётгани ҳақида маълумот берган.

“Катта еттилик” саммитидаги учрашувимиз чоғида бу масалаларни батафсилроқ муҳокама қилишга келишиб олдик”, — деди у.

Бу қўнғироқлар Трамп якшанба оқшомида Оқ уй майдонида UFC жангини ўтказиб, туғилган кунини нишонлашга ҳозирланаётган бир пайтда амалга оширилди.

Тадбир якунлангач, Трамп G7 саммити учун Францияга учиб кетиши режалаштирилган. Саммитда Украина асосий муҳокама мавзуси бўлиши ва йиғилишга Зеленский ҳам қўшилиши кутилмоқда.

Россияга зарбалар

Дипломатик музокаралар давом этаётган жанглар фонида бўлиб ўтди. Якшанба куни Украина дронлари ҳужуми оқибатида Россиянинг Орёл вилояти марказидаги турар-жой биносида бир киши ҳалок бўлиб, яна тўққиз киши жароҳатланди.

Маҳаллий ҳокимият хабарига кўра, якшанба куни Россиянинг Брянск вилоятида содир бўлган яна бир дрон ҳужумида бир киши ўлган.

Бошқа бир дрон ҳужуми Украина чегарасидан қарийб 440 миль узоқликдаги Россиянинг Ярославл вилоятида жойлашган ёқилғи сақлаш омборларига зарба бериб, ёнғинлар келтириб чиқарган. Зеленскийнинг таъкидлашича, ушбу зарба босқинчи давлатнинг захираси учун муҳим бўлган нефть объектига қаратилган.

Россия нефть танкери ушланди

14 июнь куни Британия кучлари Ла-Манш бўғозида Россиянинг уруш билан боғлиқ санкцияларни четлаб ўтиш учун фойдаланадиган “соя флотига” мансуб деб гумон қилинган кемани қўлга олди.

“Ушбу операция Россияга яна бир зарба беради ва Путиннинг Украинадаги урушини авж олдираётганларга яширина олмасликларини эслатади”, - деди Буюк Британия бош вазири Кир Стармер