“Трамп билан гаплашишдан мамнун бўламан” – Тайван президенти

Тайван президенти Лай Чинг-те пайшанба куни АҚШ раҳбари Доналд Трамп билан суҳбатлашишдан “мамнун” бўлишини айтди. Бундай мулоқот қирқ йилдан ортиқ давом этиб келган дипломатик протоколни бузиши ва Хитойнинг кескин норозилигига сабаб бўлиши мумкин.

Оқ уй Тайванга қурол-яроғ сотиш масаласини кўриб чиқаётган бир пайтда, чоршанба куни Трамп журналистларга Лай билан гаплашишини маълум қилди.

Агар мулоқот амалга ошса, бу Вашингтон 1979 йилда дипломатик алоқаларни Тайпейдан Пекинга ўтказганидан бери амалдаги Тайван ва АҚШнинг президентлари илк бор бир-бири билан суҳбатлашиши бўлади.

“Тайван Тайван бўғозидаги мавжуд барқарор статус-квони сақлаш тарафдори” ва “Хитой тинчлик ва барқарорликни издан чиқарувчи томон”дир, — дея маълум қилди Лай.

"У билан ўзим гаплашаман. Мен ҳамма билан гаплашаман", — деди Трамп.

Шу билан бирга, ўтган ҳафта Пекинга давлат ташрифи чоғида Хитой раиси Си Сзинпин билан ажойиб учрашув ўтказганини қўшимча қилди.

Хитой оролни ўз ҳудудининг бир қисми деб ҳисоблайди ва уни куч ишлатиб эгаллаш билан таҳдид қилади.  Трампнинг тахминича, Тайванга қурол-яроғ сотишдан Хитой билан савдолашишда восита сифатида фойдаланиш мумкин.

Шундан сўнг Лай ҳукумати ҳужумкор позицияни эгаллаб, АҚШнинг Тайванга нисбатан сиёсати ўзгармаганини ва Трамп Хитой олдида оролга қурол сотиш бўйича ҳеч қандай мажбурият олмаганини қатъий таъкидлай бошлади.

Тайван Хитойнинг ҳар қандай эҳтимолий ҳужумини қайтариш учун АҚШ кўмагига қаттиқ таянади.

2016 йилда, ўзининг илк сайловдаги ғалабасидан сўнг, сайланган президент Трамп Тайваннинг ўша вақтдаги президенти Сай Инвеннинг телефон қўнғироғини қабул қилиб, Пекиннинг ғазабини қўзғатган ҳамда дипломатлар, жаҳон етакчилари ва Хитой бўйича мутахассисларни ҳайратда қолдирганди.