Саида Мирзиёева Қатарда «Ўзбекистон: ҳаракатдаги мерос» кўргазмасида иштирок этди

Тадбир Қатар музейлари раиси Шайха Ал-Маясса бинт Ҳамад бин Халифа Ол Соний иштирокида ўтказилди.

Экспозицияда Ўзбекистон музейлари ҳамда Қатар коллекцияларида сақланаётган ноёб экспонатлар жамланган. Кўргазма ислом дини тарқалишидан аввалги даврлардан бошлаб Сомонийлар ва Темурийлар даври орқали бугунги кунгача бўлган тарихий босқичларни қамраб олган.

Унда тарихий осори-атиқалар билан бир қаторда анъанавий ҳунармандчилик ва тўқимачилик санъати намуналари ҳам намойиш этилмоқда.

Саида Мирзиёева кўргазма Қатар халқи ва мамлакат меҳмонларини Ўзбекистоннинг бой тарихи ва маданий мероси билан яқиндан таништириш учун муҳим имконият эканини таъкидлади. Унинг қайд этишича, лойиҳа Ўзбекистон ва Қатар ўртасидаги маданий алоқаларни янада ривожлантиришга хизмат қилади.

Шу куни Қатарнинг етти нафар ҳунармандлари Тошкент, Самарқанд ва Бухорога қилган ижодий сафарлари натижасига бағишланган «Ektashif Uzbekistan» кўргазмаси ҳам очилди.

Унда ўзбек маданияти ва анъаналаридан илҳомланган қатарлик ҳунармандлар томонидан яратилган заргарлик буюмлари, хаттотлик намуналари, гиламлар ҳамда ижодий сафар давомида олинган фотосуратлар намойиш этилмоқда.

Икки кўргазманинг бир вақтда ташкил этилиши Ўзбекистоннинг тарихий-маданий меросини халқаро майдонда кенг тарғиб қилиш ва мамлакатлар ўртасидаги маданий мулоқотни кучайтиришга қаратилган.