Трамп Нью-Мексико штати номини қайта номлашни таклиф қилди

Штат губернатори томонидан зудлик билан рад этилган бу таклиф Трамп қўшни Канада билан савдо уруши фонида Онтарио кўлини “Америка кўли” деб қайта номлаш тўғрисидаги фармонни имзолаганидан бир неча кун ўтиб янгради.

“Кўпчилик Нью-Мексико номини... ЯНГИ АМЕРИКА деб ўзгартиришни таклиф қилмоқда. Бу ажойиб салоҳиятга эга штат аҳолиси учун анча обрўлироқ ва чиройлироқ бўларди. Воу, бу менга жуда ёқди!!!” — деб ёзди республикачилар президенти ижтимоий тармоқда.

Штат номидаги “Мексика” сўзи ўчирилиб, ўрнига “Америка” деб ёзилган сурат ҳам эълон қилди.

Штат губернатори Мишел Лухан Гришем Fox News телеканалига берган интервьюсида: “Бу ном муҳокама қилинмайди — у АҚШ пайдо бўлишидан аввалам бизники эди”, — деди.

Унинг сўзларига кўра, президент ёқилғи нархининг кескин ошиб кетиши каби масалалардан америкаликларнинг диққатини чалғитмоқчи.

Трампнинг топонимик ташаббуслари

Ўтган ҳафта Трамп Эрон билан уруш давом этаётган бир пайтда Ҳурмуз бўғозини “Трамп бўғози” деб қайта номлашни таклиф қилди, бироқ бир неча соат ўтгач, бу жиддий режа эмаслигига ишора қилди.

У 2025-йилда Оқ уйга қайтган биринчи куниёқ Мексика кўрфазини “Америка кўрфази” деб ўзгартирди, аммо бу ҳаракат Мексика томонидан рад этилди.

Канада ҳам Онтарио кўлини қайта номлашга бўлган уринишни қабул қилмади.

Бундан ташқари, август ойида Атлантика ёки Тинч океанидан бирининг номини ёки иккаласини ҳам алмаштиришни "ножиддий" таклиф қилганди.