"Green Card 2027" расман очилади

АҚШнинг Калифорния штатидаги федерал суд Давлат департаментини 2027 йил учун Green Card лотереясини қайта очишга мажбур қилди. Бу ҳақда Courthouse News Service хабар берди.

Сан-Диего шаҳридаги АҚШ округ суди судьяси Жинсук Оҳта 14 октябрь куни дастурни қайта тиклашни талаб қилувчи дастлабки суд қарорини чиқарди. Унга кўра, АҚШ Давлат департаменти аризаларни қабул қилиш бошланадиган ва тугайдиган саналарни, ариза топшириш веб-сайтини ҳамда иштирок этиш шартларини эълон қилиши лозим.

Суд рўйхатдан ўтиш даври камида 30 кун давом этиши кераклигини ҳам белгилади.

Green Card лотереяси нега қайта тикланмоқда?

АҚШ маъмурияти жорий йил учун лотереяга рўйхатдан ўтишни белгиланган вақтда бошламаган. Кейинчалик ҳукумат аризаларни қабул қилишни бошлаш учун кеч бўлганини билдирган.

Шундан сўнг Калифорниядаги Red Eagle Law юридик фирмаси Давлат котиби Марко Рубиога қарши судга мурожаат қилиб, дастурни қайта очишни талаб қилди.

Суд қароридан кейин Давлат департаментига рўйхатдан ўтиш муддатларини очиқ эълон қилиш ва белгиланган даврда келиб тушган электрон аризаларни қабул қилиш мажбурияти юклатилди. Бунда аризачилар дастур талаблари ва ҳужжатларга оид шартларга жавоб бериши керак.

2027 йилги лотерея бўйича қандай муддатлар белгиланган?

Bloomberg Law нашрининг 15 октябрдаги хабарига кўра, суд Давлат департаментидан лотереяни 18 октябрга қадар очишни, аризаларни қабул қилиш даврини эса 19 ноябргача давом эттиришни талаб қилган.

Дастур АҚШга иммиграция даражаси тарихан паст бўлган мамлакатлар фуқароларига доимий яшаш ҳуқуқини олиш учун имконият яратади. Лотерея орқали йилига 55 минг нафаргача шахс виза олиши мумкин.

Муаллиф: Ҳасанбой ОЧУН