Tramp Nyu-Meksiko shtatini qayta nomlashni taklif qildi

Shtat gubernatori tomonidan zudlik bilan rad etilgan bu taklif Tramp qo‘shni Kanada bilan savdo urushi fonida Ontario ko‘lini “Amerika ko‘li” deb qayta nomlash to‘g‘risidagi farmonni imzolaganidan bir necha kun o‘tib yangradi.

“Ko‘pchilik Nyu-Meksiko nomini... YANGI AMERIKA deb o‘zgartirishni taklif qilmoqda. Bu ajoyib salohiyatga ega shtat aholisi uchun ancha obro‘liroq va chiroyliroq bo‘lardi. Vou, bu menga juda yoqdi!!!” — deb yozdi respublikachi prezident ijtimoiy tarmoqda.

Shtat nomidagi “Meksika” so‘zi o‘chirilib, o‘rniga “Amerika” deb yozilgan surat ham e’lon qildi.

Shtat gubernatori Mishel Lujan Grishem Fox News telekanaliga bergan intervyusida: “Bu nom muhokama qilinmaydi — u AQSH paydo bo‘lishidan avvalam bizniki edi”, — dedi.

Uning so‘zlariga ko‘ra, prezident yoqilg‘i narxining keskin oshib ketishi kabi masalalardan amerikaliklarning diqqatini chalg‘itmoqchi.

Trampning toponimik tashabbuslari

O‘tgan hafta Tramp Eron bilan urush davom etayotgan bir paytda Hormuz bo‘g‘ozini “Tramp bo‘g‘ozi” deb qayta nomlashni taklif qildi, biroq bir necha soat o‘tgach, bu jiddiy reja emasligiga ishora qildi.

U 2025-yilda Oq uyga qaytgan birinchi kunidayoq Meksika ko‘rfazini “Amerika ko‘rfazi” deb o‘zgartirdi, ammo bu harakat Meksika tomonidan rad etildi.

Kanada ham Ontario ko‘lini qayta nomlashga bo‘lgan urinishni qabul qilmadi.

Bundan tashqari, avgust oyida Atlantika yoki Tinch okeanidan birining nomini yoki ikkalasini ham almashtirishni "nojiddiy" taklif qilgandi.