Ukrainaga Yevropa Ittifoqiga qo‘shilish uchun eshik ochilmoqda

Chorshanba kuni Yevropa Ittifoqi Ukraina va Moldovaning a’zolikka kirish yo‘lidagi navbatdagi qadamni tashlashiga ruxsat berdi. Diplomatlarning ta’kidlashicha, Vengriya Kiyevga qarshi uzoq yillik vetosidan voz kechayotganiga ishora bermoqda.

Yevropa Ittifoqi Ukraina bilan a’zolikka kirish bo‘yicha muzokaralarni 2024-yil iyun oyida rasman boshlagan edi. Yillar davom etadigan ushbu murakkab jarayon qishloq xo‘jaligidan tortib qonun ustuvorligigacha bo‘lgan barcha masalalarni qamrab oladi.

Biroq bu ramziy bosqichligicha qolib, jarayonning amalda boshlanishini Vengriyaning sobiq bosh vaziri Viktor Orban orqaga surayotgandi.

Joriy yilning aprelida Orban lavozimidan chetlatilgach, Vengriyaning yangi bosh vaziri Peter Magyar Budapeshtning Kiyev bilan hal etilmagan masalalari yechimini topsa, mamnuniyat bilan Ukrainaning a’zolikka kirish harakatlarini yoqlashini bildirdi.

Chorshanba kuni Magyar Ukraina bilan venger etnik ozchiligining huquqlari bo‘yicha “tarixiy kelishuv”ga erishilganini e’lon qilishi – muhim o‘zgarishlardan dalolat. Chunki bu masala uzoq vaqtdan beri qo‘shnilar o‘rtasidagi munosabatlarni taranglashtirayotgan edi.

Vengriya Tashqi ishlar vaziri Peter Siyartoning ma’lum qilishicha, Budapesht Ukraina milliy ozchiliklar bo‘yicha harakatlar rejasiga tuzatish kiritishini istaydi. Shundan so‘ng “Ukrainaning Yevropa Ittifoqiga a’zoligi bo‘yicha muzokaralarning birinchi klasterini ochishga rozi bo‘ladi”.

Siyartoning bayonotini olqishlagan Yevropa Ittifoqining kengayish masalalari bo‘yicha komissari Marta Kos fikricha, bu Ukrainaning Yevropa Ittifoqiga a’zolik yo‘lida olg‘a siljishiga imkon yaratadi.

2022-yildagi Rossiya bosqinidan bir necha kun o‘tib boshlangan Ukrainaning Yevropa Ittifoqiga a’zo bo‘lish harakati Vengriya qarshiligi sabab to‘xtab qolgandi.

Ammo Magyar ham Ukrainaning Yevropa Ittifoqiga tezlashtirilgan tartibda qo‘shilishiga qarshiligini ta’kidladi.

Shuningdek, u agar Ukraina kelgusi 10-15 yil ichida a’zolikka oid barcha 33 ta bandni yopishga muvaffaq bo‘lsa, mamlakat uning a’zoligi yuzasidan referendum o‘tkazishini aytdi.