“Уруш вазири ишдан бўшатилиши керак” — АҚШ сенатори

Дастлабки тергов натижаларидан хабардор манбаларга кўра, бунга яқин атрофдаги ҳарбий-денгиз базаси ҳақидаги эскирган разведка маълумотлари сабаб бўлган.

Нишон нега янглиш белгиланган?

28 февраль куни Минаб шаҳридаги Шажареҳ Таййиба мактабига берилган зарба АҚШ ҳарбийлари қўшни Ислом инқилоби қўриқчилари корпуси (ИИҚК) объектини нишонга олаётган вақтда юз берган.

CNN манбаларига кўра, АҚШ Марказий қўмондонлиги (CENTCOM) зарба координаталарини белгилашда Мудофаа разведка бошқармаси (DIA) тақдим этган эскирган маълумотлардан фойдаланган.

2013 йилги сунъий йўлдош тасвирлари мактаб ва ИИҚК базаси битта ҳудудда бўлганини кўрсатади. Бироқ 2016 йилги кадрларда мактаб базадан девор билан ажратилгани ва алоҳида кириш йўли қурилгани аниқ кўринади. 2025 йил декабрь ойидаги тасвирларда эса мактаб ҳовлисида ўйнаётган ўнлаб одамларни кўриш мумкин бўлган.
 

Фото: CNN

Изоҳ: Мактаб сариқ билан белгиланган. Оқ билан чизилган узуқ-узуқ чегара мактаб ва Ислом инқилоби қўриқчилари корпуси биноси ўртасидаги девор.

Президент Доналд Трамп 11 март куни АҚШнинг ушбу зарба учун жавобгарлиги ҳақидаги дастлабки тергов хулосаларидан хабари йўқлигини айтди.

“Мен бу ҳақда билмайман” ,- дея жавоб берди Трамп CNN мухбирининг жавобгарликни бўйнига олиш ҳақидаги саволига.

Аввалроқ президент зарбада Эроннинг ўзини айблашга уринган эди. Нима учун унинг маъмурияти бу даъвони қўллаб-қувватламаётгани ҳақидаги саволга эса: “Чунки мен бу ҳақда етарли даражада билмайман”, деб жавоб берган.

Фото: Экран ёзуви

Бироқ, АҚШ сенатори Элизабет Уоррен Х ижтимоий тармоғидаги саҳифасида: “Трамп маъмурияти Эрондаги қизлар мактабининг бомбардимон қилинишини тасдиқлади. Бу сўнгги ўн йилликлардаги энг ҳалокатли ҳарбий хатолардан бири”, - дея ёзиб қолдирган. Шунингдек, сенатор Трампнинг гаплари ёлғонлигини, АҚШ Уруш вазири Пет Хигсет ишдан бўшатилиши кераклигини ҳам таъкидлаган.

Эроннинг Mehr News агентлиги томонидан эълон қилинган ва CNN томонидан тасдиқланган видеолавҳалар экспертлар фикри тўғрилигини кўрсатмоқда. Кадрларда Американинг BGM ёки UGM-109 Tomahawk қанотли ракетаси базага келиб урилгани, унинг ўнг томонида — мактаб йўналишида эса улкан тутун кўтарилаётгани акс этган.

Эрон расмийлари вайрон бўлган мактаб олдида намойиш этган қисмлар Американинг Tomahawk ракетаси қолдиқларига мос келади. Трамп эса Эроннинг ўзида ҳам шундай ракеталар борлигини иддао қилди, бироқ экспертлар буни рад этмоқда.

Roytheon компанияси томонидан ишлаб чиқарилган ушбу ракеталар фақат АҚШнинг саноқли иттифоқчиларида бор. Ҳатто Исроилда ҳам бундай ракеталар мавжуд эмас.

Тергов давом этмоқда

Мудофаа вазири Пит Хегсет 10 март куни зарба бўйича пухта тергов ўтказилишини ваъда қилди. У АҚШ тинч аҳоли орасида талофатларни олдини олиш учун барча чораларни кўрганини айтиб, Эронни нишон танламасдан зарба беришда айблади.

Оқ уй матбуот котиби Каролин Ливитт ҳам тергов ҳали якунланмаганини ва якуний хулосаларни кутиш кераклигини таъкидлади. Айни пайтда Пентагондан расмий изоҳ бериш сўралган, бироқ вазирлик ҳозирча сукут сақламоқда.

                                                          Муаллиф: Мафтуна БАХТИËРОВА