Венесуэла мухолифатчиси Трампга Нобель мукофоти медалини совға қилди

Бу ҳақда Reuters агентлиги хабар берди.

Трамп ушбу учрашувни юқори баҳолаб, ижтимоий тармоқдаги саҳифасида Мачадо билан кўришишни катта шараф деб атади. Унинг сўзларига кўра, Мачадо ушбу совғани Трампнинг Венесуэла халқи озодлиги йўлидаги саъй-ҳаракатларига нисбатан ўзаро ҳурмат белгиси сифатида тақдим этган.

Оқ уй расмийсининг маълум қилишича, Трамп медални ўзида сақлаб қолиш ниятида. Мачадо эса бу учрашувни “жуда самарали” дея таърифлаб, совға Трампнинг Венесуэлада демократияни қўллаб-қувватлаётганига берилган эътироф эканини таъкидлади.

Шу билан бирга, қайд этилишича, Нобель мукофоти расман бошқа шахсга ўтказилиши мумкин эмас. Норвегия Нобель институти қоидаларига кўра, мукофотни топшириш, бўлишиш ёки қайтариб олиш имкони йўқ. Шу сабабли, Мачадо медални берган бўлса-да, лауреат мақоми унинг ўзида қолади.

Бу учрашув Трамп ва Мачадонинг илк юзма-юз мулоқоти бўлди. Учрашувдан сўнг Мачадо Капитолийда бир қатор америкалик сенаторлар билан ҳам учрашди. Оқ уй матбуот котиби Каролин Ливиттнинг айтишича, Трамп Мачадони ҳурмат қилса-да, ҳозирча унинг Венесуэлада етарли сиёсий қўлловга эга эмас, деган фикрда.