Venesuela muxolifatchisi Trampga Nobel mukofoti medalini sovgʻa qildi

Bu haqda Reuters agentligi xabar berdi.

Tramp ushbu uchrashuvni yuqori baholab, ijtimoiy tarmoqdagi sahifasida Machado bilan koʻrishishni katta sharaf deb atadi. Uning soʻzlariga koʻra, Machado ushbu sovgʻani Trampning Venesuela xalqi ozodligi yoʻlidagi saʼy-harakatlariga nisbatan oʻzaro hurmat belgisi sifatida taqdim etgan.

Oq uy rasmiysining maʼlum qilishicha, Tramp medalni oʻzida saqlab qolish niyatida. Machado esa bu uchrashuvni “juda samarali” deya taʼriflab, sovgʻa Trampning Venesuelada demokratiyani qoʻllab-quvvatlayotganiga berilgan eʼtirof ekanini taʼkidladi.

Shu bilan birga, qayd etilishicha, Nobel mukofoti rasman boshqa shaxsga oʻtkazilishi mumkin emas. Norvegiya Nobel instituti qoidalariga koʻra, mukofotni topshirish, boʻlishish yoki qaytarib olish imkoni yoʻq. Shu sababli, Machado medalni bergan boʻlsa-da, laureat maqomi uning oʻzida qoladi.

Bu uchrashuv Tramp va Machadoning ilk yuzma-yuz muloqoti boʻldi. Uchrashuvdan soʻng Machado Kapitoliyda bir qator amerikalik senatorlar bilan ham uchrashdi. Oq uy matbuot kotibi Karolin Livittning aytishicha, Tramp Machadoni hurmat qilsa-da, hozircha uning Venesuelada yetarli siyosiy qoʻllovga ega emas, degan fikrda.