Марказий Банк пластик картадан ноқонуний пул ечиб олиниши юзасидан муносабат билдирди

9 декабрь ҳолатига кўра, Humans мобил иловаси орқали Octagram АЖ томонидан амалга оширилаётган барча тўлов хизматлари вақтинча тўхтатилган.

Uzcard ва Humo карталари орқали амалга ошириладиган тўлов ва ўтказмалар одатий тартибда ишламоқда. Шунингдек, карталардан бошқа банк ва тўлов ташкилотлари иловалари орқали фойдаланиш имконияти ҳам сақланиб қолган.

Марказий банк хабарида таъкидланишича, айни пайтда барча шубҳали транзакциялар, техник жараёнлар ва платформалар ўртасидаги ўзаро ҳамкорлик тўлиқ ўрганилмоқда. Текширув якунлари бўйича қўшимча расмий маълумот тақдим этилиши маълум қилинди.

Шунингдек, Марказий банк мазкур ҳолат бўйича фуқаролар белгиланган тартибда ҳуқуқни муҳофаза қилувчи органларга мурожаат қилишлари мумкинлигини билдирди.

Маълумот ўрнида, 2025 йил ёзида Octobank Humans’ни судга бериб, ундан 500 миллиард сўм молиявий зарар ундириш бўйича судда ютган эди. “Ўзбектелеком” компанияси ҳам Humans’нинг катта миқдорда қарздорлиги мавжудлигини маълум қилган ва шу муносабат билан судга даъво киритган.