Жаҳон тиллари университетидаги «Хавфсиз талаба» можароси: декан ишдан олинди

Ўзбекистон давлат жаҳон тиллари университетида талабаларга «Хавфсиз талаба» мобил иловасини ўрнатиш билан боғлиқ вазият раҳбарият даражасигача кўтарилди. Таржимонлик факультети декани Улуғбек Йўлдошев лавозимидан озод этилди.

Ҳодиса ижтимоий тармоқларда талабаларнинг шикоятлари тарқалганидан кейин кенг муҳокамага сабаб бўлди. Мурожаатларда айрим талабалардан университет ҳудудига кириш ва дарсларда иштирок этиш учун мазкур дастурни телефонларига ўрнатиш талаб қилингани айтилган.

Талабаларнинг таъкидлашича, иловани ўрнатишга вақт сарфлаган айрим ёшлар машғулотларга кечикиб борган. Баъзи ҳолларда уларнинг давоматига «НБ» белгиси қўйилгани ҳам билдирилган. Ижтимоий тармоқларда тарқалган видеоларда эса факультет вакилларининг аудиторияларда талабаларга иловани юклаб олишни таклиф қилаётгани акс этган.

Вазиятга Олий таълим, фан ва инновациялар вазирлиги ҳам муносабат билдириб, ишчи гуруҳ тузилганини ва ҳолат ўрганилаётганини маълум қилган.

Мазкур воқеада эътибор қаратилаётган асосий масала — талабалар хавфсизлигини таъминлашга қаратилган рақамли воситадан фойдаланиш тартиби ва уни таълим жараёнига татбиқ этиш усули ўртасидаги фарқдир.

«Хавфсиз талаба» иловаси электрон талабалик гувоҳномаси, давоматни кузатиш, талабалар турар жойлари фаолиятини назорат қилиш ҳамда фавқулодда вазиятларда SOS сигналини юбориш каби функцияларни қамраб олади. Бироқ бундай имкониятларни жорий этиш жараёнида талабаларнинг таълим олиш ҳуқуқи ва ташкилий талаблар ўртасидаги мувозанат масаласи ҳам кун тартибига чиқди.

Деканнинг лавозимидан озод этилиши университетдаги ушбу ҳолатнинг ташкилий оқибатларидан бири бўлди. Бироқ вазирлик текширувининг якуний хулосаси, шунингдек, кадрлар қарорига асос бўлган ҳолатлар бўйича батафсил маълумот ҳозирча очиқланмаган.

Муаллиф: Ҳасанбой ОЧУН