Ўзбекистон Ислом бирдамлиги ўйинларини 96 та медаль билан иккинчи ўринда якунлади

Мусобақада Туркия 72 та олтин 44 та кумуш ва 39 та бронза медали (жами 155) билан умумжамоа ҳисобида биринчи ўринни эгаллади. Ўзбекистон билан бир хил олтин жамғарган Эрон 81 та медаль (29−19−33) натижаси билан учинчи ўриндан жой олди.

Кучли ўнталикда Саудия Арабистони (18 та олтин) Миср (17) Баҳрайн (16) Қозоғистон (15) Нигерия (11) Марокаш (10) ва Озарбайжон (9) ҳам ўрин олди.

Марказий Осиё мамлакатлари орасида Қирғизистон 19 та медаль (4−4−11) билан 14-ўрин Афғонистон 3 та медаль (1−1−1) билан 26-ўрин Тожикистон эса 6 та медаль (0−3−3) билан 28-ўринда қайд этилди.

Ўзбекистон Миллий олимпия қўмитаси натижалар юзасидан қилган баёнотида «атлетларимиз томонидан қўлга киритилган ушбу муваффақият мамлакатимизнинг Ислом бирдамлиги спорт ассоциациясига аъзо давлатлар орасида йирик спорт державаларидан бири эканини яна бир бор намоён этди», дея таъкидлади.

Эслатиб ўтамиз, Ўзбекистон 2022 йилда Туркиянинг Конья шаҳрида ўтган V Ислом бирдамлиги ўйинларида ҳам Туркиядан кейин иккинчи ўринни эгаллаганди. Ўшанда миллий делегация 51 та олтин 42 та кумуш ва 65 та бронза жами 158 та медаль қўлга киритган.