Андижонда илк бор «Yashil uyim» экологик фестивали ўтказилади

Андижонда илк бор «Yashil uyim» экологик фестивали ташкил этилади. Тадбир 26 сентябрь куни соат 12:00 дан 19:00 гача Berlin Zentrum мажмуасида ўтказилади. Манзил: Андижон шаҳри, Чўлпон кўчаси, 193-уй. Кириш барча учун бепул.

Фестиваль экологик турмуш тарзини тарғиб қилиш, чиқиндиларни саралаш ва қайта ишлаш, ресурслардан оқилона фойдаланиш ҳамда замонавий илмий ва экологик ечимларни оммалаштиришга қаратилган.
Катталар ва ёшлар учун дастур
Фестивальнинг асосий майдонида очилиш маросими, DJ дастури, совринли ўйинлар, очиқ маърузалар, муҳокамалар ва амалий машғулотлар ўтказилади.

Дастурда қуйидаги мавзулар бўйича учрашувлар режалаштирилган:
13:00–14:00 — «Имо-ишора тилини ўрганамиз». Имо-ишора тили мутахассиси Эъзоза Аҳмедова кундалик ҳаётда зарур бўладиган асосий ишоралар ва инклюзив мулоқот ҳақида сўзлайди.
14:00–15:00— «Экологик яшаш қиммат эмас: уйда нимадан бошлаш керак?». ORGANIC LIVING асосчиси Ойдин Пўлатова экологик одатларни катта харажатларсиз шакллантириш ҳақида маълумот беради.
15:00–16:00 — «Саратон геномикаси». Биолог ва ихтиолог Муроджон Рахмонов генетик ўзгаришларнинг саратон ривожланишидаги ўрни ҳақида маъруза қилади.
16:00–17:00 — «Нега чиқиндиларни саралаш керак?». Экологик фаол ва Batareykalar.Uz лойиҳаси асосчиси Ферузбек Сайфуллаев чиқиндиларни алоҳида йиғиш ва саралашнинг амалий аҳамиятини тушунтиради.
17:00–18:00 — ёшлар учун «Экология ёки иқтисодиёт?» мавзусида мунозара.
19:00 — фестиваль дастури «WALL·E» мультфильмининг ўзбек тилидаги намойиши билан якунланади.

Болалар учун алоҳида дастур
Фестиваль доирасида болалар учун Kid's Zone махсус ҳудуди ташкил этилади.
Унда:
14:00–15:00 — «Математика амалда» машғулоти;
15:00–16:00 — илмий тажрибалар намойиши;
16:00–17:00 — «Fikrlab» китоби тақдимоти ва «Менинг эко сумкам» лойиҳаси;
17:00–18:00 — робототехника машғулоти ўтказилади.
Экоярмарка, чиқиндиларни қабул қилиш ва SWAP ҳудуди
Фестиваль давомида экологик маҳсулотлар ва маҳаллий экологик ташаббуслар ҳамда илмий ишланмалар ярмаркаси ишлайди.

Шунингдек, махсус қабул пунктларида батарейкалар, ишлатилган ўсимлик ёғи, қоғоз, целлофан ва алюминий қабул қилинади.
SWAP ҳудудида ташриф буюрувчилар китоб, гул ва турли буюмларни ўзаро алмашишлари мумкин. Фестиваль меҳмонлари шахмат ўйнаш имкониятига ҳам эга бўлади.

Ташкилотчиларнинг таъкидлашича, «Yashil uyim» фестивали экологик масъулиятни кундалик ҳаётнинг бир қисмига айлантириш, фойдали одатларни шакллантириш ва атроф-муҳитни муҳофаза қилишга қаратилган амалий ечимларни кенг тарғиб қилиш учун очиқ майдон вазифасини ўтайди.