«Demokrat.uz» раҳбари ва блогерга суд ҳукми ўқилди

Жиноят ишлари бўйича Миробод туман судида «Demokrat.uz» интернет нашри раҳбари Фазлиддинхон Меҳмонов ҳамда блогер Азиз Ғоипназаровга оид жиноят ишини кўриб чиқиш якунланди.

11 ноябр куни эълон қилинган ҳукмга кўра, 1998 йилда туғилган, муқаддам судланган Ф.М. Жиноят кодексининг 165-моддаси (товламачилик), 168-моддаси (фирибгарлик) ва 248-моддаси (ўқотар қурол, ўқ-дорилар ва бошқа хавфли воситаларнинг қонунга хилоф муомаласи) бўйича айбли деб топилди.

Унга 10 йил 3 ой муддатга озодликдан маҳрум қилиш жазоси тайинланди.

1991 йилда туғилган, муқаддам судланган Азиз Ғоипназаров эса Жиноят кодексининг 165-моддасида назарда тутилган товламачилик жиноятини содир этганликда айбли деб топилиб, 10 йил 1 ой муддатга озодликдан маҳрум қилинди.

Ҳар икки маҳкум жазони умумий тартибли колонияларда ўтайди. Шунингдек, Фазлиддинхон Меҳмоновдан жабрланувчиларга етказилган моддий зарарни ундириш белгиланди.

Эслатиб ўтамиз, жорий йилнинг 12 феврал куни эълон қилинган расмий хабарда мазкур шахсларга нисбатан товламачилик юзасидан жиноят иши қўзғатилгани маълум қилинган эди.

Тергов маълумотларига кўра, улар Сергели туманидаги автосалонлардан бирининг фаолиятини обрўсизлантирувчи видеоматериал тайёрлаб, интернетга жойлаштирган.

Шундан сўнг ушбу видеони ижтимоий тармоқлардан ўчириш ҳамда тадбиркорни обрўсизлантирувчи бошқа видеолавҳани эълон қилмаслик эвазига жабрланувчидан 50 минг АҚШ доллари талаб қилган.