Taftish.uz таҳририяти ходимларига ҳукм чиқарилди

Ўзбекистон Республикаси Ҳарбий суди Taftish.uz таҳририяти ходимлари ва собиқ ходимларига оид жиноят иши бўйича ҳукм чиқарди. Суд мажлиси ёпиқ тартибда ўтказилган.

Ҳуқуқ ҳимоячиси Абдураҳмон Ташановнинг хабар беришича, таҳририят раҳбари Ғайрат Абераев 10 йил 6 ойга, журналист Маржона Эшқувватова эса 4 йил 1 ойга озодликдан маҳрум қилинган. Ишдаги яна икки нафар вакил, шунингдек ДХХнинг собиқ ходимларига ҳам 10 йилдан ортиқ муддатларга озодликдан маҳрум қилиш жазоси тайинланган. Ташановнинг билдиришича, ҳукмга кўра маҳкумлар жазони умумий тартибдаги колонияларда ўтайди.

Судланувчиларга Жиноят кодексининг 139-моддаси — туҳмат, 165-моддаси — товламачилик, 168-моддаси — фирибгарлик ҳамда 244⁶-моддаси — ёлғон ахборот тарқатиш бўйича айбловлар қўйилган. Қайси шахс қайси айблов бўйича айбдор деб топилгани ҳақида батафсил маълумот келтирилмаган.

Иш 2026 йил январь ойида бошланган. Ўша пайтда Тошкент шаҳар ИИББ Taftish.uz билан боғлиқ беш нафар шахс — Ғайрат Абераев, Азизжон Юлдашев, Сардор Хамидов, Маржона Эшқувватова ва Дилшод Нишонов процессуал тартибда ушланганини маълум қилган эди. Ўшанда уларга нисбатан товламачилик ва фирибгарлик бўйича гумонлар илгари сурилган, шунингдек туҳмат ва ёлғон ахборот тарқатиш билан боғлиқ ҳолатлар текширилаётгани айтилган эди.

Ички ишлар вазирлиги кейинчалик Taftish.uz номидан тайёрланган айрим материаллар орқали фуқаролар ва тадбиркорларнинг шаъни ва обрўсига зарар етказиш билан таҳдид қилиниб, материалларни олиб ташлаш эвазига пул талаб қилингани даъво қилган ва бу ҳаракатларни жиноий гуруҳ фаолияти сифатида баҳолаган.

Taftish.uz эса ҳибслар ортидан ўз фаолиятини давом эттиришини билдирган.