Блогер Шерали Комилов муддатдан олдин озодликка чиқарилди

Жиноят ишлари бўйича Қарши туман суди ажримига асосан блогер Шерали Комилов муддатдан илгари озодликка чиқарилди.

Жумладан, Жиноят кодексининг 165-моддаси 3-қисми (товламачилик) бўйича айблов тасдиғини топмаган. Таъкидланишича, мазкур ҳолат содир этилган деб кўрсатилган вақтда блогер қамоқда бўлган.

Шунингдек, 168-модда 3-қисми (фирибгарлик) бўйича айблов эпизодида ҳам у оқланган. Блогер устидан шикоят қилган шахснинг адвокатлик фаолияти билан шуғулланмаслиги Адлия вазирлиги томонидан тасдиқланган.

Бундан ташқари, унга нисбатан Жиноят кодексининг 28-моддаси орқали қўлланилган 120-модда (бесоқолбозлик) бўйича айблов ҳам баҳсли экани айтилмоқда. Маълум қилинишича, блогер ушбу турдаги жиноят ҳақида хабар бериб, тегишли видеоматериалларни ҳуқуқни муҳофаза қилувчи органларга тақдим этган.

Шерали Комилов фуқаролар томонидан берилган аризалар асосида қўйилган туҳмат ва ҳақоратга оид айбловлар юзасидан юқори суд инстанцияларига мурожаат қилиш ниятида.

Маълумот учун, у дастлабки тергов жараёнларида 17 ой давомида тергов ҳибсхонасида сақланган.