Фарғонада икки киши ЙТҲ қурбони бўлди

Йўл-транспорт ҳодисаси Фурқат туманидан ўтувчи "Пахтаобод – Қолгандарё" автомобиль йўлида содир бўлган. Шу йўл бўйлаб ҳаракатланиб келаётган "Cobalt" машинаси ҳайдовчиси атрофни туман қоплаган бўлишига қарамай, қарама-қарши йўналишга чиқиб ҳаракатланган. 

Айни шу вақтда "Cobalt"нинг рўпарасидан келаётган "Damas" уни пайқамай қолиши ортидан йўл-транспорт ҳодисаси содир бўлган. Оқибатда "Damas" ҳайдовчиси воқеа жойида ҳалок бўлган. Машина ичида бўлган ҳайдовчининг турмуш ўртоғи эса шифохонада вафот этган. 

Юқоридаги ЙТҲ юзасидан "Cobalt" ҳайдовчисига нисбатан Жиноят кодексининг 266-моддаси 3-қисми "а" банди (транспорт воситалари ҳаракати ёки улардан фойдаланиш вақтидаги хавфсизлик қоидаларини бузиш одамлар ўлимига сабаб бўлса, муайян ҳуқуқдан маҳрум қилиниб, ўн йилгача озодликдан маҳрум қилиш билан жазоланади) билан иш очилган. 

Йўл-транспорт ҳодисасига сабабчи қилиб кўрсатилаётган "Cobalt" ҳайдовчисига нисбатан ўқилган суд ҳукмига кўра, фуқаро 3 йил муддатга ҳайдовчилик ҳуқуқидан ҳамда 3 йилга озодликдан маҳрум қилинган. Судланувчи суд залидан қамоққа олинган. Унга тайинланган жазони тартибли колонияда ўташи белгиланган. 

Эслатиб ўтамиз, жорий йилнинг 14 октябрь куни ҳам Қашқадарё вилоятида "Nexia-1" ҳамда "Gentra" автомашиналари тўқнашиши ортидан ҳайдовчи вафот этган эди.