Фарғона ва Наманганда 2,6 кг гиёҳвандлик моддаси билан боғлиқ ҳолатлар аниқланди

Давлат хавфсизлик хизмати Фарғона ва Наманган вилоятларида гиёҳвандлик моддалари билан боғлиқ ҳолатларга чек қўйилганини маълум қилди.

ДХХ Фарғона вилояти бўйича бошқармаси ходимлари вилоят Ички ишлар ва Божхона бошқармалари билан ҳамкорликда тезкор тадбир ўтказган. Унда «Фарғона — Тошкент» йўналишида ҳаракатланаётган «Cobalt» русумли автомобиль Поп туманидаги «Наманган» ЙПХ масканида тўхтатилиб, кўздан кечирилган.

Текширув давомида автомобиль юкхонасига яшириб қўйилган 1 кг «гашиш» моддаси ашёвий далил сифатида олинган. Автомобильни 1995 йилда туғилган, Чирчиқ шаҳрида яшовчи фуқаро бошқариб келган.

Шунингдек, ДХХ Наманган вилояти бўйича бошқармаси Ички ишлар ва Божхона органлари билан ҳамкорликда Чуст туманида тезкор тадбир ўтказган.

Тадбир давомида «VAZ-2103» русумли автомобиль шубҳа остига олиниб, белгиланган тартибда текширилган. Автомобиль салонида 995 грамм «гашиш» борлиги аниқланган. Машина Янгий Наманган туманида яшовчи, 1987 йилда туғилган, муқаддам судланган шахсга тегишли бўлган.

Бундан ташқари, Наманган шаҳрида яшовчи 1975 йилда туғилган фуқаронинг хонадони холислар иштирокида кўздан кечирилганда, унинг ертўласидан 648 грамм «гашиш» моддаси топилган.

Тергов жараёнида ушбу шахс гиёҳвандлик моддасини Янгий Наманган туманида яшовчи, 1972 йилда туғилган танишидан 5 минг АҚШ долларига сотиб олгани аниқланган. Мазкур шахс ҳам процессуал тартибда ушланган.

Маълум қилинишича, ҳолатлар юзасидан барча гумон қилинувчиларга нисбатан жиноят ишлари қўзғатилган. Ҳозирда тергов ҳаракатлари олиб борилмоқда.

Муаллиф: Ҳасанбой ОЧУН