“Инсофсиз текширувчилар реестри” – тадбиркорлар учун янги ҳимоя тизими

2026 йил 1 июлдан “Ягона давлат назорати” ахборот тизими ва унинг мобил иловаси ишга туширилади.

Хусусан, тадбиркор ўзи фаолият юритаётган ҳудуддаги масъул мансабдор шахслар – туман (шаҳар) ҳокими, маҳалла раиси, ҳоким ёрдамчиси, профилактика ва солиқ инспекторлари ҳақида тўлиқ маълумот олиш ҳамда улар билан бевосита мулоқот қилиш имкониятига эга бўлади. 

Эндиликда давлат хизматчисининг тадбиркор фаолият юритаётган объектга назорат ёки профилактика тадбирисиз бориши ёки тадбиркорни бошқа жойга чақириши “назорат тадбири ҳисобланмайдиган мулоқот” сифатида расмий қайд этилади. 

Хусусан, “норасмий ҳомийлик”, асоссиз илтимослар ёки бошқа қонунчиликка зид хатти-ҳаракатлар учун замин яратадиган яширин мулоқотлар эндиликда тизимли равишда назорат остига олинади. 

Бундай мулоқотлар ҳақидаги маълумотларни “Ягона давлат назорати” ахборот тизимига киритиш давлат хизматчилари учун мажбурий.  

Энди ҳар қандай учрашув ҳужжатлаштирилади ва бу талабга амал қилинмаса, мансабдор шахсга нисбатан хизмат текшируви ўтказилиши мумкин. 

Бундан ташқари, бир йил давомида бир тадбиркор билан икки ва ундан ортиқ маротаба асоссиз мулоқотга киришган давлат хизматчиларига нисбатан қатъий чоралар белгиланди.  

Бундай ҳолатда уларга хизмат текшируви ўтказилиши, айнан шу тадбиркор фаолиятини текширишда 12 ой давомида чеклов қўйилиши ёки тадбиркорлик субъектлари фаолиятида текшириш ўтказишга ваколат берувчи махсус гувоҳноманинг вақтинча тўхтатилиши мумкин. 

Қоидаларни мунтазам бузган мансабдор шахсларнинг “Инсофсиз текширувчилар реестри”га киритилади.

“Бизнес ҳимоя” QR-коди жорий этилади

“Бизнес ҳимоя” тизими орқали тадбиркор зиммасидаги ортиқча бюрократик юклама – текширувларни рўйхатга олиш электрон китобини тақдим этиш мажбурияти бекор қилинмоқда.  

Эндиликда назорат қилувчи орган вакили текширув бошлашдан олдин тадбиркордаги QR-кодни сканер қилиш орқали барча жараённи “Ягона давлат назорати” тизимида автоматик рўйхатдан ўтказади.  

Агар давлат хизматчиси QR-код орқали текширув ёки мулоқотни тизимга киритмаса, тадбиркор уни ўз ҳудудига киритмаслик ёки мулоқотга киришмаслик ҳуқуқига эга.  

Шунингдек, 2026 йил 1 июлдан тадбиркорларни давлат рўйхатидан ўтказиш жараёнида улар учун “Ягона давлат назорати” ахборот тизимида шахсий кабинет автоматик равишда очилиши белгиланган.  

Бу фаолиятини энди бошлаётган тадбиркорларга алоҳида мурожаат ёки қўшимча ҳаракатларсиз назорат жараёнларини бошқариш, текширувлар тарихини кузатиш ва ўз ҳуқуқларини ҳимоя қилиш имконини беради.