Мубашшир Аҳмад 2 йил 6 ойга қамалди

Тошкент шаҳар жиноят ишлари бўйича Учтепа тумани судида жамоатчилик орасида Мубашшир Аҳмад номи билан танилган диний уламо Алишер Турсуновга оид суд мажлиси бўлиб ўтди. Ушбу суд мажлисида Алишер Турсуновга суд томонидан 2 йил 6 ой муддатга қамоқ жазоси тайинланди. Бу ҳақда PARADIGMA.UZ журналисти хабар қилди.

Мубашшир Аҳмадга Жиноят кодексининг 57-моддасини (енгилроқ жазо тайинлаш) қўллаган ҳолда 59 (бир неча жиноят содир этганлик учун жазо тайинлаш) ва 61 (жазоларни қўшишнинг ҳисоблаш қоидалари) моддалари тартибида 2 йил 6 ой муддатга озодликдан маҳрум қилиш жазоси тайинланди.

Иш – судя Бобур Раҳимов раислигида, қораловчи – Учтепа тумани прокурори ўринбосари Эркин Нарзуллаев, шунингдек, Абдуллоҳ Содиқ бошчилигидаги адвокатлар иштирокида кўриб чиқилди.

Судя Бобур Раҳимов раислигида ўтган суд мажлисининг музокара босқичида давлат айбловчиси Мубашшир Аҳмадга 7 йил озодликдан маҳрум қилиш жазоси берилишини сўраган эди.

Алишер Турсуновга нисбатан Жиноят кодексининг учта моддаси бўйича айблов қўйилган:

●     244-3-модда: Диний мазмундаги материалларни қонунга хилоф равишда тайёрлаш, сақлаш, олиб кириш ёки тарқатиш;

●     244-1-модда: Жамоат хавфсизлиги ва жамоат тартибига таҳдид соладиган материалларни тайёрлаш, сақлаш, тарқатиш ёки намойиш этиш;

●     156-модда: Миллий, ирқий, этник ёки диний адоват қўзғатиш.

Иш юзасидан биринчи суд мажлиси жорий йилнинг 19 август куни бўлиб ўтди. Унда прокурор иш юзасидан айблов хулосасини ўқиб эшиттирди. Мубашшир Аҳмад ўзига қўйилган айбловларнинг қарийб барчасини рад этди. Фақатгина ижтимоий тармоқларда эълон қилинган материалларни Диний қўмита рухсати билан чоп этмаганини тан олиб, бунган бу даврда Туркия давлати ҳудудида яшагани, шунинг учун хулоса олишга зарурат йўқ деб ҳисоблагани сабаб бўлганини таъкидлади.

Мажлис Мубашшир Аҳмад томонидан ижтимоий тармоқларида эълон қилинган материалларга тергов органининг сўровига кўра хулоса берган экспертлар йўқлиги сабабли қолдирилди. Иккинчи суд мажлисида "Ренессанс" университетининг сиёсатшунослик фанлари бўйича профессори Одил Мусаев материаллар бўйича сиёсий хулосалар берган. Дин ишлари бўйича қўмита Диншунослик экспертизаси бўлими мутахассиси Шаҳбоз Низомов эса материалларни диний нуқтайи назардан баҳолаган.

Суд жараёни шу вақтга қадар турли сабабларга кўра уч марта қолдирилди. Охирги марта бунга судянинг саломатлиги ёмонлашгани ва таътилда экани сабаб бўлгани хабар қилинди.