Ноқонуний қум-шағал қазиб олганлардан бир гуруҳи қўлга тушди

Экология, атроф-муҳитни муҳофаза қилиш ва иқлим ўзгариши вазири маслаҳатчиси Расул Кушербаевнинг ўз Telegram-каналида хабар қилишича, Чирчиқ дарёсининг Қуйичирчиқ тумани ҳудудидан оқиб ўтувчи қисмидан бир гуруҳ шахслар ноқонуний равишда қум-шағал қазиб олиш билан шуғулланиб келганлиги маълум бўлди. 

"Қишлоқ хўжалигида фойдаланиладиган ер майдонининг ҳам бир қисми йўқ қилинган. Ўрганишда ушбу ноқонуний ҳаракатлар натижасида табиатга 441 млрд 299 млн сўмдан ортиқ зарар етказилганлиги аниқланди", дея қайд этган Кушербаев. 

Бош прокуратура ҳузуридаги Департаментнинг аниқлашича, Самарқанд ва Навоий вилоятларида ҳам ноқонуний қум-шағал аралашмасини қазиб олиш ҳолатлари кузатилган. 

Самарқанд туманида жойлашган "Л.П." МЧЖнинг раҳбари А.Б. корхонада балиқчилик фаолиятини ташкил этиш учун ажратилган ҳудуддан ўзбошимчалик билан 33,2 минг куб метр ҳажмдаги қум-шағал аралашмасини ноқонуний қазиб олган. Бу орқали давлатга 3,1 млрд сўм зарар етказилган. 

Шу каби, Навоийнинг Кармана тумани "Янги ариқ" МФЙ ҳудудида жойлашган ер майдонидан 79,3 минг куб метр ҳажмдаги қум-шағал аралашмаси ноқонуний қазиб олинганлиги маълум бўлган. Оқибатда давлат ва жамият манфаатларига 1,1 млрд сўм зарар етказилган. 

"Мазкур ҳолатлар юзасидан Жиноят кодексининг 192-11-моддаси (нодавлат тижорат ташкилотида ёки бошқа нодавлат ташкилотида мансабдор шахслар томонидан ўз ваколатларини суиистеъмол қилиш) ва 229-моддаси (ўзбошимчалик) билан жиноят ишлари қўзғатилиб, тергов ҳаракатлари ўтказилмоқда", дейилади департамент хабарида.

Бундан ташқари, яна бир ҳолат Самарқанд вилоятининг Нарпай туманида аниқланган. Вилоятнинг Экология, атроф-муҳитни муҳофаза қилиш ва иқлим ўзгариши бошқармаси ишонч телефонига Нарпай тумани "Мушкент" маҳалласи фуқаролари томонидан мурожаат келиб тушган. 

Ушбу мурожаат Каттақўрғон ва Нарпай туманлари Экология бўлими давлат инспекторлари ҳамда ушбу маҳалла фуқаролари иштирокида ўрганилган. Ўрганиш давомида Каттақўрғон тумани "Боғот" маҳалласида яшовчи фуқаро шу туманнинг "Найман" маҳалласи ҳудудидан оқиб ўтувчи Қорадарё дарёси ўзанидан ўзбошимчалик билан ноқонуний тарзда қум-шағал аралашмасини қазиб олиб, юк машиналарига ортиб бераётганлиги аниқланган. 

"Ҳолат юзасидан ҳуқуқбузарга нисбатан Ўзбекистон Республикаси Маъмурий жавобгарлик тўғрисидаги Кодексининг 70-моддаси прим 1-қисми билан маъмурий баённома расмийлаштирилди. Унга базавий ҳисоблаш миқдорининг 30 баравари — 10 миллион 200 минг сўм миқдорида жарима белгиланди", дейилади Экологя вазирлиги ахборот хизмати томонидан берилган хабарда. 

Шунингдек, Нарпай туманида ўтказилган яна бир рейд давомида туманнинг "Мустақиллик" маҳалласида яшовчи фуқаро С.Р. ўз бошқарувидаги экскаватор билан шу маҳалла ҳудудидан оқиб ўтувчи Қорадарё дарёси ўзанидан қум-шағал аралашмасини ноқонуний қазиб олиб, юк ташувчи машиналарга юклаб бераётганлиги маълум бўлган. 

Мазкур ҳолат юзасидан С.Р.га нисбатан Маъмурий жавобгарлик тўғрисидаги кодекснинг 70-моддаси прим 1-қисмига асосан маъмурий баённома расмийлаштирилиб, БҲМнинг 20 баробари — 6 миллион 800 минг сўм миқдорида жарима қўлланилди. Бу орқали табиатга 1 миллион 1172 минг сўм зарар етказилганлиги аниқланди. Ҳуқуқбузар жами 7 миллион 972 минг сўм тўлайдиган бўлди.