Тошкентда чинор дарахтига зарар етказган фуқаро 20 млн сўмдан зиёд жарима тўлайди

Баён қилинишича, Тошкент шаҳар Экология, атроф-муҳитни муҳофаза қилиш ва иқлим ўзгариши бошқармаси томонидан Учтепа туманида навбатдаги рейд тадбирлари ўтказилди. 

Рейд давомида тумандаги "Бўғобод" MFY Фозилтепа кўчасидаги қурилиш объекти ҳудудида бир туп чинор дарахтининг таг қисми фуқаро И.Д. томонидан атайин бетонланганлиги аниқланган. бунинг оқибатида табиатга 1 миллион 500 минг сўм зарар етказилган. 

Ҳолат юзасидан ҳуқуқбузарга нисбатан Ўзбекистон Республикаси Маъмурий жавобгарлик тўғрисидаги Кодекси (МЖтК)нинг 79-моддаси 1-қисми билан маъмурий баённома расмийлаштирилган. И.Д.га нисбатан базавий ҳисоблаш миқдорининг 50 баравари — 18 миллион 750 минг сўм жарима белгиланди. Ҳуқуқбузар қилмиши учун жами 20 миллион 250 минг сўм товон тўлайдиган бўлди. 

Маълумот учун, МЖтКнинг 79-моддасига кўра, дарахтларни, буталарни, бошқа ўсимликларни ва ниҳолларни қонунга хилоф равишда кесиш, кундаков қилиш, шикастлантириш, йўқ қилиш ёки бошқа жойга кўчириб ўтказиш фуқароларга базавий ҳисоблаш миқдорининг 25 бараваридан 50 бараваригача, мансабдор шахсларга эса 50 бараваридан 75 бараваригача миқдорда жарима солишга сабаб бўлади.