Тошкентдаги мактабларда юқумли вирус тарқалди

Қайд этилишича, "Санепидқўм"нинг Миробод тумани бўлими мутахассислари томонидан 214- ва 65-мактабларда вирусли гепатит касаллиги аниқлангани сабабли у ерда эпидемиологик текшириш ва санитария назорати ўтказилган. 

Текширув давомида ўқитувчилар, ўқувчилар ва ишчи ходимларнинг ўз вақтида тиббий кўрикдан ўтганлик хулосалари, шахсий гигиена қоидаларига риоя қилиш тартиби, мактаб биноси ва синфхоналарда жорий тозалик ишларининг олиб борилиши, жиҳозларнинг созлиги, иситиш тизимлари ёқилиб фойдаланишга топширилгани ҳамда ҳожатхоналарда гигиена қоидаларига риоя қилиниши, қўл ювиш мосламалари ва оқова сув тизимининг соз ҳолатдалиги кўздан кечирилган. 

Ўрганишлар давомида мактабларнинг санитария ҳолати талабга жавоб бермаслиги маълум бўлган. Сўнг аниқланган камчиликлар юзасидан мактаб раҳбариятига нисбатан маъмурий баённома тузилган. 

Маълумот учун, вирусли гепатит — жигарнинг яллиғланиши билан боғлиқ бўлиб, у бир нечта турдаги вируслар томонидан юзага чиқади. Бу ҳолат жигарни зарарли таъсирлар орқали шикастлантиради ва унинг нормал фаолиятини бузади. Ўзбекистонда бу вирус кўпинча санитария шароитлари ёмон бўлган ҳудудларда учрайди. 

Вирусли гепатит бешта асосий турга бўлинади. Булар: А, B (сариқ), C, D ва E. Шулардан Ўзбекистонда B ва C гепатитлари кенг тарқалган. Гепатит B, C вируси қон орқали тарқалади, яъни инфексияланган одамларнинг қонига ёки тана суюқликларига тўғридан-тўғри алоқада бўлиш орқали юқади. Мазкур вируслар сурункали бўлади ва жигар циррози ёки жигар саратонига олиб келади.