Toshkentdagi maktablarda yuqumli virus tarqaldi

Qayd etilishicha, "Sanepidqoʻm"ning Mirobod tumani boʻlimi mutaxassislari tomonidan 214- va 65-maktablarda virusli gepatit kasalligi aniqlangani sababli u yerda epidemiologik tekshirish va sanitariya nazorati oʻtkazilgan. 

Tekshiruv davomida oʻqituvchilar, oʻquvchilar va ishchi xodimlarning oʻz vaqtida tibbiy koʻrikdan oʻtganlik xulosalari, shaxsiy gigiyena qoidalariga rioya qilish tartibi, maktab binosi va sinfxonalarda joriy tozalik ishlarining olib borilishi, jihozlarning sozligi, isitish tizimlari yoqilib foydalanishga topshirilgani hamda hojatxonalarda gigiyena qoidalariga rioya qilinishi, qoʻl yuvish moslamalari va oqova suv tizimining soz holatdaligi koʻzdan kechirilgan. 

Oʻrganishlar davomida maktablarning sanitariya holati talabga javob bermasligi maʼlum boʻlgan. Soʻng aniqlangan kamchiliklar yuzasidan maktab rahbariyatiga nisbatan maʼmuriy bayonnoma tuzilgan. 

Maʼlumot uchun, virusli gepatit — jigarning yalligʻlanishi bilan bogʻliq boʻlib, u bir nechta turdagi viruslar tomonidan yuzaga chiqadi. Bu holat jigarni zararli taʼsirlar orqali shikastlantiradi va uning normal faoliyatini buzadi. Oʻzbekistonda bu virus koʻpincha sanitariya sharoitlari yomon boʻlgan hududlarda uchraydi. 

Virusli gepatit beshta asosiy turga boʻlinadi. Bular: A, B (sariq), C, D va E. Shulardan Oʻzbekistonda B va C gepatitlari keng tarqalgan. Gepatit B, C virusi qon orqali tarqaladi, yaʼni infeksiyalangan odamlarning qoniga yoki tana suyuqliklariga toʻgʻridan-toʻgʻri aloqada boʻlish orqali yuqadi. Mazkur viruslar surunkali boʻladi va jigar sirrozi yoki jigar saratoniga olib keladi.