Йирик аварияларнинг олдини олиш учун свет 2 соатгача ўчирилиши мумкин — Энергетика вазирлиги

Ўзбекистон ягона энергетика тизимида 16-июль куни суткалик электр энергияси истеъмоли 291 миллион кВт·соатни ташкил этиб, янги рекорд қайд этилди. Бу кўрсаткич ўтган йилги энг юқори даражадан 18,4 миллион кВт·соатга (6,7 фоизга) юқори.

Шу билан бирга, 16-июль куни суткалик ишлаб чиқариш ҳажми ҳам 295,4 миллион кВт·соатга етиб, янги рекорд ўрнатилди — бу 15-июльдаги 291,4 миллион кВт·соатлик кўрсаткичдан 4 миллион кВт·соат (1,37 фоиз) кўп.

Нима учун тармоқлар хавф остида?

Очиқ ҳавода жойлашган электр узатиш тармоқлари ва ускуналари қуёш таъсирида меъёрий ҳароратдан анча юқори қизимоқда. Бунга қўшимча равишда, кундузги вақтларда минглаб кондиционер, музлаткич ва бошқа совутиш жиҳозларининг бир вақтда ишлаши тармоқлардаги юкламани янада кучайтирмоқда. Бу эса ускуналарнинг ишдан чиқиши ёки аварияга учраши хавфини оширмоқда.

Қандай чоралар кўрилмоқда?

Йирик носозликларнинг олдини олиш мақсадида диспетчерлик хизматлари юкламани камайтириш чораларини кўрмоқда. Хусусан, юклама критик даражага яқинлашган ҳудудларда ускуналарни ҳимоя қилиш мақсадида қисқа муддатга электр таъминоти узиб турилиши мумкин — бу узоқ муддатли таъмирлаш талаб қиладиган йирик аварияларнинг олдини олиш учун зарур чора ҳисобланади.

Фавқулодда вазиятларни тезкор бартараф этиш учун ҳудудларда туну кун фаолият юритувчи махсус авария бригадалари ташкил этилган.

Қайси ҳудудларда чеклов жорий этилди?

Ўта юкламанинг олдини олиш мақсадида бир қатор ҳудудларда 2 соатлик мажбурий чеклов жорий этилди:

- Қашқадарё вилояти, Кўкдала ва Чироқчи туманлари — 1750 истеъмолчи

- Жиззах вилояти, Шароф Рашидов ва Зомин туманлари — 1200 истеъмолчи

- Хоразм вилояти, Шовот, Гурлан ва Қўшкўпир туманлари — 1300 истеъмолчи

- Тошкент вилояти, Тошкент ва Зангиота туманлари — 1000 истеъмолчи

Расмийлар аҳолидан электр энергиясидан оқилона ва тежамкор фойдаланишни, зарурат бўлмаган ҳолларда электр жиҳозларидан фойдаланишни чеклашни сўради. Шунингдек, юзага келган ноқулайликлар учун истеъмолчилардан узр сўралган.