Yirik avariyalarning oldini olish uchun quyidagi hududlarda svet 2 soatgacha o‘chirilishi mumkin — Energetika vazirligi

O'zbekiston yagona energetika tizimida 16-iyul kuni sutkalik elektr energiyasi iste'moli 291 million kVt·soatni tashkil etib, yangi rekord qayd etildi. Bu ko'rsatkich o'tgan yilgi eng yuqori darajadan 18,4 million kVt·soatga (6,7 foizga) yuqori.

Shu bilan birga, 16-iyul kuni sutkalik ishlab chiqarish hajmi ham 295,4 million kVt·soatga yetib, yangi rekord o'rnatildi — bu 15-iyuldagi 291,4 million kVt·soatlik ko'rsatkichdan 4 million kVt·soat (1,37 foiz) ko'p.

Nima uchun tarmoqlar xavf ostida?

Ochiq havoda joylashgan elektr uzatish tarmoqlari va uskunalari quyosh ta'sirida me'yoriy haroratdan ancha yuqori qizimoqda. Bunga qo'shimcha ravishda, kunduzgi vaqtlarda minglab konditsioner, muzlatkich va boshqa sovutish jihozlarining bir vaqtda ishlashi tarmoqlardagi yuklamani yanada kuchaytirmoqda. Bu esa uskunalarning ishdan chiqishi yoki avariyaga uchrashi xavfini oshirmoqda.

Qanday choralar ko'rilmoqda?

Yirik nosozliklarning oldini olish maqsadida dispetcherlik xizmatlari yuklamani kamaytirish choralarini ko'rmoqda. Xususan, yuklama kritik darajaga yaqinlashgan hududlarda uskunalarni himoya qilish maqsadida qisqa muddatga elektr ta'minoti uzib turilishi mumkin — bu uzoq muddatli ta'mirlash talab qiladigan yirik avariyalarning oldini olish uchun zarur chora hisoblanadi.

Favqulodda vaziyatlarni tezkor bartaraf etish uchun hududlarda tunu kun faoliyat yurituvchi maxsus avariya brigadalari tashkil etilgan.

Qaysi hududlarda cheklov joriy etildi?

O'ta yuklamaning oldini olish maqsadida bir qator hududlarda 2 soatlik majburiy cheklov joriy etildi:

- Qashqadaryo viloyati, Ko'kdala va Chiroqchi tumanlari — 1750 iste'molchi

- Jizzax viloyati, Sharof Rashidov va Zomin tumanlari — 1200 iste'molchi

- Xorazm viloyati, Shovot, Gurlan va Qo'shko'pir tumanlari — 1300 iste'molchi

- Toshkent viloyati, Toshkent va Zangiota tumanlari — 1000 iste'molchi

Rasmiylar aholidan elektr energiyasidan oqilona va tejamkor foydalanishni, zarurat bo'lmagan hollarda elektr jihozlaridan foydalanishni cheklashni so'radi. Shuningdek, yuzaga kelgan noqulayliklar uchun iste'molchilardan uzr so'ralgan.